Түркістан облысында сүт және ет өнімдерін өндіру бойынша көрсеткіштерді “жақсарту” мақсатымен мал басын қосып жазған 174 ауыл әкімі жауапқа тартылды, деп хабарлайды kazbusiness.kz тілшісі Түркістан облысының прокуратурасының ресми сайтына сілтеме жасап.
Облыстық прокуратураның мәліметінше, “Қолжетімді жайылым” жобасының аясында 174 ауыл әкімі Әкімшілік құқық бұзушылық туралы кодекстің 498-бабы (“Статистиканы қосып жазу және бұрмалау”) бойынша жауапқа тартылған. Оларға жалпы 5 млн теңге көлемінде әкімшілік айыппұл салынған.
“Әкімдер ауыл аймақтарда сүт және ет өнімдерін өндіру бойынша көрсеткіштерді “жақсарту” мақсатында статистикалық есептерге қасақана шаруа қожалықтарындағы мал бастарын қосып жазған.
Нәтижесінде бұрмаланған есептерді аудан әкімдері жайылымдық жерлерді басқару жобасын түзу және бекіту барысында қолданған.
Қазіргі таңда аталған статистика прокурорлардың ықпалымен ретке келтіріліп, облыс бойынша нақты қажеттілік 3 есеге, яғни 2,1 млн га-дан 652 мың га дейін төмендеген”, – делінген хабарламада.
Бұдан бөлек, ведомство прокурорлық актілердің негізінде қала, аудан әкімдіктерімен бұның алдында бекітілген мағыналас жобаларды қайта қарау жұмыстары жүргізіліп жатқанын атап өтті.
Сонымен қатар, Түркістан облысының прокуратурасы осы тектес кемшіліктерді алдын алу мақсатында стратегиялық жоспарлау және реформалар бойынша агенттікке, Ауылшаруашылығы министрлігіне және Цифрлық даму, инновациялар және аэроғарыш өнеркәсібі министрлігіне мал шаруашылығы саласындағы бағдарламаларды интеграциялау бойынша бірқатар ұсыныс жолдағанын да айта кетті.
