Ақтөбеде өзіне қол жұмсау фактісін азайту мақсатында 25 қабатты үйдің балкондары мен шатырына шығатын есік жабылады, деп хабарлайды Kazbusiness.kz тілшісі «Диапозон» порталына сілтеме жасап.
Тәулігіне орта есеппен өз-өзіне қол жұмсаудың екі фактісі тіркеледі. Ақтөбеде – 143, Мұғалжар ауданында – 5, Шалқар ауданында – 4, Мәртөк пен Әйтеке би аудандарының әрқайсысында үшеуден суицид жасау әрекеті тіркелді, – деп хабарлады облыстық прокуратура.
Прокурорлар әкімдікке хат жолдап, онда суицидті азайтуға арналған іс-шараларды бөлісті. Олар 25 қабатты «Ақтөбе Ажары» тұрғын үй балкондарының ашық жерлеріне қоршау орнатуды ұсынып отыр.
Ал пәтер иелерінің кооперативтері, кондоминиумдар және мүлік иелерінің бірлестігі люктерге құлыптар орнату арқылы шатырларға кіруді шектеуі керек. Сондай-ақ мамандардың ведомствоаралық тобын құру ұсынылып отыр. Топ мүшелері суицидтің алдын алу тетігін әзірлеу, халықаралық тәжірибені пайдалану бойынша әрбір жағдайды зерделеуі қажет болады.
