Қаратал ауданындағы «ТастөбеАгроФуд» ЖШС күніне 600 сиырдан 10 тонна сүт сауып отыр. Өнімін Талдықорғандағы «JLC» сүт зауытына өткізеді.
Осыдан 6 жыл бұрын ашылған ферманың сауын жүйесі толықтай автоматтандырылған. Жобаға 1,8 млрд теңге инвестиция тартылды. Серіктестікте қазір 80-нен аса адам еңбек етеді. Орташа жалақысы 200 мың теңге шамасында.
Ауданға жұмыс сапарымен барған облыс әкімі Бейбіт Исабаев сүт-тауар фермасының тыныс-тіршілігімен танысты. Сонымен қатар, серіктестік басшысына қуаттылығы жоғары құрама жем өндіретін зауыт салу керектігін айтты. Ол үшін жергілікті билік тарапынан тиісті көмектің барлығы көрсетілмек.
Облыс басшысы 85 адамға жұмыс беріп отырған «Үштөбе-Айдын» сүт заутында да болды. Онда жылына 5,5 мың тонна өнім өндіріледі.
