Президент Қасым-Жомарт Тоқаев Үндістан премьер-министрі Нарендра Модиге көңіл айту жеделхатын жолдады деп хабарлайды Kazbusiness.kz тілшісі Ақорда ресми сайтына сілтеме жасай отырып.
Мемлекет басшысы теміржол апатында қаза тапқан жандарға байланысты көңіл айтты.
“Одиша штатындағы Баласорадағы көптеген адам шығынына әкелген теміржол апаты туралы қайғылы жаңалық көңілге қаяу түсірді. Қазақстан халқының атынан және өз атымнан жақындарынан айырылған отбасыларға шын жүректен көңіл айтамын. Барлық зардап шеккендердің тезірек сауығып кетуін тілеймін. Осы қайғылы сағатта Үндістан халқымен ынтымақтастығымызды растаймыз”, – делінген жеделхатта.
Естеріңізге сала кетсек, Үндістанда пойыз рельстен шығып кетіп, 300 жуық адам қаза тапқаны туралы хабарлаған болатынбыз.
Бастапқыда теміржол апатынан ондаған адамның қаза тапқаны хабарланған еді. РИА Новости агенттігінің хабарлауынша, соңғы мәліметтер бойынша пойыздардың соқтығысуынан қаза болғандар саны 288-ге дейін өскен.
