Бүгін ел Президенті Қасым-Жомарт Кемелұлы ұлықтау рәсімінде ең алдымен қолға алатын бірнеше мәселеге арнайы тоқталды. Соның бірі – ауылдық жерді дамыту.
«Мен сайлауалды сөздерімде ауылды өркендету ісіне баса назар аудардым. Бүгінде Қазақстан халқының 40 пайызға жуығы ауылда тұрады. «Ауыл – ел бесігі» деп халқымыз бекер айтқан жоқ. Сондықтан, ауылдағы жағдайды жақсарта алмасақ – бәрімізге сын. Сол үшін мен бүгін ауылды дамыту мәселесі туралы Жарлыққа қол қоямын. Осы құжат арқылы Үкіметке ауылды дамытудың 5 жылға арналған нақты жоспарын әзірлеуді тапсырамын. Бұл менің жаңа президенттік мерзімдегі бірінші Жарлығым болады. Үкімет ауылды дамытуға арналған барлық жобаны жүйелі түрде реттеп, жинақтауға тиіс. Содан кейін мақсатты түрде тиімді жұмыс жүргіземіз»,- деді өз сөзінде .
Сондай-ақ, Мемлекет басшысы «Қазір – сайлаудағы жеңісті тойлайтын кез емес, аянбай еңбек ететін кез»,- деп арқаны кеңге салмай, бірден іске кірісу қажет екенін айтты.
