Түркия президент сайлауы өтті. Алайда кандидаттардың ешбірі 1-айналымдағы жеңіске қажетті 50% дауыстарды жинай алған жоқ. Сондықтан 28 мамыр күні президент сайлауының 2-айналымы өтуі мүмкін, деп хабарлайды kazbusiness.kz.
Түркиядағы президент сайлауы кеше Астана уақытымен 20:00-де аяқталды. Anadolu агенттігінің есептеуінше, сайлау бюллетеньдерінің 94%-ы қаралғаннан кейін Режеп Тайып Ердоған 49,59% дауыс жинаған. Ал бірыңғай оппозиция атынан сайлауға түскен Кемал Кылычдароғлуға сайлаушылардың 44,67%-ы дауыс берген.
Айта кеткен жөн, алғашқы кезде жоғары көрсеткішті көрсеткен Ердоғанның нәтижесі бюллетеньдердің 91%-ын өңдегеннен кейін 50% дауыстан төмен түсті. Түркияның жоғарғы сайлау кеңесі (YSK) сайлаудың толық нәтижелерін 19 мамырда жариялауды жоспарлап отыр.
