Интернет арқылы сауда жасайтындардың жұмысына шағымданғандардың қатарында маңғыстаулықтарда бар.
Олар бұқара арасында кеңінен танылған “Wildberries” ЖШС үстінен шағым түсірген.
Онлайн сауданың көркін қызыдрып тұрған бұл платформа сапасыз тауар үшін тұтынушыға 52 770 теңгені қайтарудан бас тартқан. Сондай-ақ, Маңғыстау облыстық тұтынушылардың құқығын қорғау департаментінен өңірдің тағы бір тұрғыны 255 мың теңгені қайтаруға көмек сұраған. Мамандар сатушымен байланысып, Тұтынушылардың құқықтарын қорғау туралы заңының нормаларына сәйкес мән-жайларды түсіндірді, содан кейін өтініш берушіге ақшасы қайтарылды. Сонымен қатар, тұтынушыға сапасыз тауар үшін ірі кәсіпкерлік субъектісінен 296 мың теңгені қайтаруға көмектесті.
Қаперіңізде жүрсін, егер сатушы немесе өндіруші неғұрлым ұзақ мерзім жарияламаса, сатып алушы оған азық-түлік емес тауарды сатқан сәттен бастап 14 күн ішінде тауарды сатып алу орнында немесе сатушы жариялаған өзге де орындарда басқа мөлшердегі, нысандағы, габариттегі, стильдегі, түстердегі, жинақтаудағы және сол сияқты ұқсас тауарға айырбастауға не тараптардың келісімі бойынша баға айырмашылығы болған жағдайда сатушымен қайта есептеу жүргізіп басқа тауар алуға құқылы.
Сатушыда немесе өндірушіде айырбастау үшін қажетті тауар болмаған кезде тұтынушы оны қайтаруға және ол үшін төленген қаржыны алуына болады.
