Ұлттық қауіпсіздік комитетінің бұрынғы төрағасы Кәрім Мәсімов шығарылған үкімге қатысты апелляциялық шағым түсірді, деп хабарлайды Kazbusiness.kz.
Бұдан бұрын хабарланғандай, биыл 24 сәуірде Астана қаласының қылмыстық істер жөніндегі мамандандырылған ауданаралық соты Ұлттық қауіпсіздік комитетінің бұрынғы төрағасы Кәрім Мәсімовке және оның орынбасарлары А.Садықұловқа, Д.Ерғожинге, М.Осиповке қатысты қылмыстық іс бойынша үкімін жария етті.
Апелляциялық шағымды Мәсімовтің бұрынғы орынбасарлары да берді.
«Апелляциялық шағым түсірілді, бірақ іс апелляциялық сотқа әлі келіп түскен жоқ. Атап айтқанда, іс «аса құпия» белгісімен қаралғандықтан, басқа мәліметтер жария етуге жатпайды», – делінген қалалық сот баспасөз қызметінің мәліметінде.
Еске сала кетейік, ҰҚК бұрынғы басшысы Кәрім Мәсімов қаңтар оқиғасынан кейін «мемлекетке опасыздық жасады, билікті күшпен басып алуға тырысты» деп айыпталып, 18 жылға сотталған болатын.
