Маңғыстау облысының қылмыстық істер бойынша мамандандырылған ауданаралық сотында өзінің үш баласын өлтірді деп айыпталған ер адамға қатысты үкім оқылды. Бұл туралы kazbusiness.kz Lada.kz басылымына сілтеме жасап хабарлайды.
Басылымның жазуынша, сот айыпталушы Е.-нің үйге балта мен ас үй пышағымен қаруланып келіп, асқан қатігездікпен қасақана өзінің кішкентай үш баласын өлтіргенін анықтаған.
“Сотталушы Е.-нің қылмыс жасаудағы кінәсі жәбірленушінің, сотталушының өзінің куәлігімен, сараптама қорытындыларымен, заттай дәлелдемелермен және істің басқа да материалдарымен дәлелденді”, – делінген соттың баспасөз қызметі таратқан хабарламада.
Сот ер адамды Қылмыстық кодекстің 99-бабы 3-бөлігі бойынша кінәлі деп танып, оған өмір бойына бас бостандығынан айыру жазасын тағайындады.
Сондай-ақ оған өмір бойына кәмелет жасына толмаған балаларға қатысты қызметтерде жұмыс істеуге тыйым салынды. Сот үкімі заңды күшіне енген жоқ.
Еске сала кетсек, наурыз айында Ақтаудағы пәтерлердің бірінен денесінде зорлық-зомбылық белгілері бар 2011, 2014 және 2016 жылы туған үш баланың мәйіті табылған болатын. Қылмысты жасады деген күдікпен полиция марқұмдардың 36 жастағы әкесін ұстаған еді.
