Жұмыссыз қалған жаңаөзендіктердің жасаған митингіне қатысты полиция мәлімдеме жасады, деп хабарлайды kazbusiness.kz порталы.
“Кеше елордада мұнай саласының сервистік компаниясының бір топ қызметкері рұқсат етілмеген митинг ұйымдастырды. Ел заңнамасына сәйкес, бұқаралық жария іс-шаралар кезінде халықтың тіршілігін қамтамасыз ету нысандарының қалыпты жұмысына кедергі келтірмеу керек. Арнайы бөлінген орындарда өткізілуге тиіс. Жергілікті атқарушы органдарды алдын ала хабардар ету қажет”, – деді полиция.
“Бейбіт жиналыстар туралы” заңды бұзған акцияның бірқатар ұйымдастырушысы мен белсенді қатысушылары полицияға жеткізілді. Олар Әкімшілік құқықбұзушылық туралы кодекстің 488 және 667-баптары бойынша жауапкершілікке тартылады.
Соңғы деректер бойынша, 30 АЕК (103 500 теңге) айыппұл салынуы немесе 15 тәулікке дейін қамауға алынуы мүмкін.
