Жетісу облысы, Қаратал ауданында кәсіпкерлер палатасынының аудандық филиалы аудандық прокуратурамен бірге осы саладағы заңбұзушылықтарды анықтап жедел түрде жолын кесу мақсатында, аудан прокуроры Марат Қасымов, аудандық кәсіпкерлер кеңесінің төрағасы Серікжан Жексембиев , Аудандық кәсіпкерлер палатасының директоры, аудандық мәслихаттың депутаты Фархат Құсайыновтың қатысуымен «Бизнестің түйткілді мәселелері» жөнінде кәсіпкерлермен ашық пікірталас түріндегі жиын өтті.
Кездесу барысында аудан прокуроры Марат Сырымұлы бүгінгі таңда аудан кәсіпкерлерінің құқығын қорғау мен осы салададағы заңбұзушылықтарға жол бермеу мақсатында құрамында аудандық прокуратура қызметкері мен жергілікті атқарушы органдардың, «Атамекен» Ұлттық Кәсіпкерлер Палатасының өкілдері кіретін мобильді топ жұмыс жасап жатқандығы атап өтті.
Ал, жиында сөз алған аудандық кәсіпкерлер палатасының директоры Фархат Құсайынов кәсіпкерлер қауымына бөтеннің мүлкін жымқыру, сенімді теріс пайдалану жолымен бөтен мүлкін иемденуге бағытталған телефон алаяқтығынан сақ болуға шақырып, аталғандай жағдайға кездесіп жатсаңсыздар құқық қорғау орындарына хабарласыңыздар деп ескертті.
Айта кетейік, аталмыш кездесу арнайы жол картасының аясында өткізілді.
Естеріңізге саламыз, 2021 жылдың басында облыстық кәсіпкерлер палатасы мен өңірлік прокуратура арасында бірлескен ынтымақтастық туралы Жол картасына қол қойылған болатын.
Бас құжатқа сәйкес, кәсіпкерлердің құқықтарын қорғау мен құқықтарын бұзу фактілерінің жолын кесу бойынша бірлескен нақты іс-шаралар көзделген.
