«ЖУСАН» тобының активтері елге қайтарылады, деп хабарлайды kazbusiness.kz.
Қаржы ұйымының қызметін Қазақстан өзі бақылау керек. Бас прокуратураның ресми сайтында осындай ақпарат жарияланды.
Былтыр жауапты ведомство “Жусан”банкінде арнайы тексеріс жүргізіп, капиталдың шетелге жөнелтілгенін анықтады. Салдарынан қаражатын осы банкте ұстайтын “Назарбаев Университеті” мен “Назарбаев Зияткерлік мектептерінің” мүддесіне қауіп төнді.
Сондай-ақ “Назарбаев қорының” өкілдері де Прокуратураға арыз жіберіп, “Жусан” тобы шет мемлекет азаматтарының бақылауына өтіп кету деректері бойынша, шара қабылдауды талап етті.
Бұл тексерістер ұйымның қазіргі қызметіне еш кедергі келтірмейді. Клиенттермен жұмыс тоқтаған жоқ. Жусан банктің ресми парақшасында осыны растайтын ақпарат жарияланды.
Қаржы нарығын реттеу және дамыту агенттігі де осы жағдайға қатысты мәлімдеме жасады. Онда банк өзінің міндеттемелерін толық әрі уақытылы орындап жатқаны айтылған.
