2021-2025 жылдарға арналған кәсіпкерлікті дамыту жөніндегі ұлттық жоба Кәсіпкерлік белсенділікті арттыру, уәсіпкерлердің өсуін акселерациялау, жаңа тауашаларды қалыптастыру,бәсекелестікті кешенді дамыту сынды 4 бағыт бойынша жүзеге асырылады. Бизнеске қолдау танытуды көздеген бағдар өзіне тән 10 міндет, 30 көрсеткіш және 69 іс-шарамен айқындалады.
«Ұлттық жоба өз ісін ашу және дамыту үшін жағдай жасауға және субсидияланатын жұмыс орындарын ұйымдастыру арқылы кәсіпкерлерді қолдау және кәсіпкерлердің қажеттіліктеріне қарай дағдыларды дамытуды көздейді. Сондай-ақ, кәсіпкерлік субъектілері үшін қаржыландырудың қолжетімділігін арттыруға бағытталған»,- деді вице-министр.
Естеріңізге саламыз, өткен жылы ұлттық жоба үшін 897 млрд. теңге бөлінген еді, соның 565 млрд. теңге бюджеттен тыс қаражат есебінен берілген болатын Ал биыл, 1,5 трлн. теңге қаржы қарасытырлса, 1,2 трлн теңгесі бюджеттен тыс қаржыдан бөлінген.
Ұлттық жоба біраз істі іргерлеткені жасырын емес. Оның бір дәлелі 2021 жылы 403 мың адам тұрақты жұмыс орындарына орналасып, 320 мың су жаңа жұмыс орындары ашылуы. Жұмыспен қамтуға жәрдемдесудің белсенді шараларымен 814 мың адам қамтылып, сәйкесінше табысы ең төмен күнкөріс деңгейінен аз ауыл халқының үлесі төмендеді. Сонымен қатар, жалпы ішкі өнімде шағын және орта кәсіпкерліктің үлесі өсті. Тағы бір айта кетерлігі, экономикадағы мемлекеттік сектордың үлесі 14,5%-ға дейін төмендеді.
Биылғы жылғы нәтижелерде көңіл көншітеді. Соңғы 8 ай ішінде 16,8 мыңға жуық жоба мемлекеттен қолдау тауып, субсидия алды. Сонымен қатар, 399 жобаға гранттар берілді. Ол қаражат қызмет көрсету және өңдеу өнеркәсібі салаларын дамытуға берілген.
Кәсіпке енді аяқ басқан жандардың да бағы жанды. Нәтижесінде «Бастау Бизнес» жобасы шеңберінде 75,1 мың адам оқып, кәсіпке бағдар алды. Тіпті 33 адам Шетелдік бизнес-тағылымдамадан өтті.
«Елдің ЖІӨ-дегі ШОК-тың үлесін 33,8%-ға дейін жеткізу бас жоспардың алғашқы бөлігі. Сонымен 175 мың жаңа жұмыс орнын құру да осы жылға қойылған міндеттер қатарында. «Бастау бизнес» шеңберінде оқудан кейін өз ісін ашқан адамдардың үлесін 40%-ға дейін жеткізіп, 700 мың адамды жұмыспен қамтуға жәрдемдесу жобаның негізгі міндеті», – дейді ҚР ұлттық экономика вице-министрі Әлібек Қуантыров.