Ашуланған кәсіпкер алдымен газқағарларды шенеуніктің алдына лақтырған. Кәсіпкердің сөзінше, тапсырыс берушілер тауарың жоқ деп сотқа берген.
“Бұлар тек өздерінің үйреніп қалған компанияларымен жұмыс істейді. 60 миллион мемлекетке қайтарып отырған ақшам ешкімді қызықтырып жатқан жоқ. Бұлардың тек айтатыны да сотқа бар”, – деді кәсіпкер Гүлсахар Гасанов.
Кәсіпкер 187 миллион теңге шығындап, қажетті бес мың дана газқағарды сатып алғанын дәлелдей алмай жүргенін айтады. Сондықтан тауарын көрсету үшін әкімдікке келіп, шенеуніктердің алдына тастаған
“Сенде тауар жоқ деп жатыр. Міне, көріңіздер, алыңыздар. Келесіде маған сенде тауар жоқ демеңіздер”, – деп қосты Гүлсахар.
Ал әкімдік болса, тауар уақытылы жеткізілмегендіктен, сотқа жүгінгендерін айтады.
“Бұл кісілердің 2022 жылғы келісімшарты бойынша соттың шешімі шықсын. Егер де біздің тарапқа төлеп берсін, осылардың тауары алынсын деп шешім шықса, біздің тараптан заңға сәйкес төлеп, тауарын аламыз”, – деді Шымкент әкімдігі аппаратының мамандандырылған базасының басшысы Ердәулет Құрманғазы.
Шымкент қаласының әкімдігі бірер күннен кейін тағы 4 мың газқағарға конкурс жарияламақшы. Бірақ шенеуніктер дайын тауарын өткізе алмай жүрген Гүлсахардың газқағарларын алуға үзілді-кесілді қарсы.
