Kazbusiness club мүшелерінің өндіріс орындары мен кәсіпкерлік нысандарға сапары жалғасуда. Бұл жолы клуб мүшелері Алматы облысы Қарасай ауданы Қаскелең қаласында орналасқан тұрмыстық және санитарлық-гигиеналық қағаз бұйымдарын өндіретін ШК «Компания Маолин» ЖШС кәсіпорнына барды, деп хабарлайды kazbusiness.kz.
Кәсіпорын дәретхана қағазын, майлықтарды, қағаз сүлгілерді шығаратын алғашқы өндірушілердің бірі. Зауыттың бір жылда ішінде 10-15 мың тоннаға дейін макулатура өңдеп, 31 миллионнан астам дайын өнім шығаруға мүмкіндігі бар. Қазіргі таңда өндіріс орнында 140 жұмысшы еңбек етуде. Олардың орташа жалақысы 160 мың теңгені құрайды.
ЖШС 1995 жылы құрылып, 2009 жылы Қаскелең қаласында өндіріс зауыты іске қосылған. Алматы, Астана және Шымкент қалаларында сату бөлімдері бар. Компания басшылығының айтуынша, «Маолин» елдегі санитарлық мақсаттағы қағаз өнімдерін шығаратын жетекші өндіруші саналып, нарықтағы сұраныстың 60%-ына ие. Сондай-ақ компания өнімдері шетелге де экспортталады. Оның ішінде Қырғызстан мен Ресейге.
Зауыт жылына 6000 тонна дайын өнім шығарып, заманауи құрал-жабдықтардың арқасында жоғары әрі сапалы қағаз өнімдерін шығаруға мүмкіндік беруде. Зауыттағы өндіріс макулатура өңделетін бөлім, қағазды тазалау бөлімі, дайындау аймағы секілді бірнеше аймақтан тұрады.
Компания басшылығы Kazbusiness club мүшелеріне зауытты аралатып, өндіріс жұмысымен таныстырған соң, іс-шара аяғында дөңгелек үстелде кәсіпкерлердің сұрақтарына жауап берді. Өндіріс директоры Лайық Бахыттың еңбек жолы қатысушыларды сүйісіндірді. Ол зауытқа 2008 жылы жүргізуші болып келіп, сатылай жоғарылап, бүгінде зауыт басшысы қызметіне дейін жеткен.
Зауыт өкілдерінің сөзінше, алдағы уақытта «Маолин» ЖШС-ның өзге қалаларда сату бөлімдерін ашу жоспарланып отыр.
