Бүгін “Отбасы банк” АҚ-ның “Ұмай” әйелдер ипотекасына өтінімдер қабылдау басталды. Бір қызығы бөлінген қаражат жарты күннің ішінде игерілді. Десе де, халықтың ризашылығынан наразылығы басым, деп жазады kazbusiness.kz.
18 шілде күні “Отбасы банк” елімізде әйелдерге арналған “Ұмай” ипотекалық бағдарламасы бойынша өтініш қабылдау басталатынын хабарлаған. Бірақ белгіленген лимит жарты күнге жетпей толды. Ведомство осыған байланысты өтініш беруді жабуға мәжбүр болғанын инстаграм парақшада хабарлады.
“Ұмай әйелдер ипотекасы бойынша қолайлы шарттар банк бөлімшелерінде үлкен сұраныс тудырды.
Күннің бірінші жартысында несие беру лимиті толықты, өкінішке орай, біз бүкіл Қазақстан бойынша өтінімдерді қабылдауды жабуға мәжбүрміз”, – делінген “Отбасы банк” хабарламасында.
Десе де әлеуметтік желі қолданушыларының пікіріне қарағанда ешкім ипотека рәсімдеп үлгермеген. Әйтеуір бір қиындыққа тап болған көрінеді. Мысалы Индира Рахман банкке барғанша бөлінген қаржы лимитінің бітіп қалғанын жазған.
“Видеозвонокпен болады деп айтылып еді. 3-4 рет видеоқоңырау шалып, кезекте 10 адам қалғанда, автоматты түрде 64-65 адамға жылжып отырды. Содан соң видеозвонокпен болмайды, бөлімшеге бару керек дедіңіздер. Бөлімшеге барсақ, лимит таусылған. Өкінішті, қызмет көрсету сапасы ақсап тұр”, – деп жазды ол.
Сонымен қатар Гүлсім Досанова есімді желі қолданушы да өз наразылығын білдірген. Қызмет көрсету сапасының ақсап тұрғанын да айтқан. Видеоқоңырау арқылы рәсімдеуге болады деп сол арқылы кезегін күткен. Айтуынша, кезегін сағаттап күткен.
“Қызмет кімге көрсетіліп жатқаны белгісіз, тек онлайн қабылданады деп заявка алып қалды. Сонда да бөлімшеге бронь жасадық, екі жақтап көре берейік деп. Видеоқоңырауларға жауап берілмеді. Сағаттап күтіп отырдық. Ал банк бөлімшесі лимит бітті деп қайтарды. Жаттанды жауап жазудың қажеті жоқ, әділ жұмыс жасаңыздар. Таныс-туыстарыңызға ипотека рәсімдеу арқылы лимитті тауыспай”, – деп наразылығын білдірген.
Сонымен қатар ол кезектің көп болмасы үшін жасау керек әрекеттерді де тізіп шыққан. Кезек көп болмас үшін предквалификацияны ертерек жасатып, тек мақұлданған кезде өтінімді онлайн қабылдау керек деп жазды Гүлсім Досанова.
Барлық наразы пікірлерге жауап та жазылған. Барлығына дайын бір жауап қайтарылған. Банк операторларының жазуынша, “Ұмай” әйелдер ипотекасы бойынша қолайлы шарттар банк бөлімшелерінде үлкен сұраныс тудырған. Осыған байланысты күннің бірінші жартысында несие беру лимиті толыққан.
“Өтінімдерді қабылдау үшін бөлінген транш қалдықтары пайдаланылды. Өтінімдерді қабылдау Алматы, Астана, Атырау, Ақтау қалаларынан басқа еліміздің барлық қалаларында болды”, – делінген оператор жауабында.
Шолпан есімді желі қолданушысының жазуынша, таңғы 7.50-де банк бөлімшесіне барған екен.
“7.50 бардым. Кезекпен кірдім. Менеджер алдында 1 сағат отырдым. Лимит бітіп қалды деді. Менеджер 1 сағат бойы жауап ала алмай отырды. Түсініксіз”, – деп жазды ол.
