Оқулықтар цифрлық түрде мемлекеттік сараптамадан өтіп, оқу-әдістемелік кешендер тізіміне енгізілді, деп хабарлайды kazbusiness.kz порталы ҚР Білім және ғылым министрлігінің баспасөз қызметіне сілтеме жасап.
Цифрлық оқулықтарды әзірлеуге еліміздің 11 баспасы тартылды. Пәндерді оқытуда инновациялық тәсілдерді енгізу мақсатында оларды педагогтар пайдалану үшін әдістемелік ұсынымдар әзірленді.
“Бүгінде елімізде бастауыш сынып оқулықтарының 94%-ы, 5-9 сынып оқулықтарының 81%-ы, 10-11 сынып оқулықтарының 61%-ы электронды нұсқаға ауыстырылды. 2024 жылы пәндерді цифрлық оқулықтармен жүз пайыз қамту жоспарлануда”, – деді орта білім комитетінің төрағасы Қаныбек Жұмашев.
Электрондық оқулықтармен қатар мектептерде қосымша оқу материалы ретінде мультимедиялық мазмұны бар цифрлық білім беру ресурстары белсенді қолданылады. Бүгінгі таңда 50 мыңнан астам цифрлық білім беру ресурстары құрылды.
2023 жылдың басынан бастап цифрлық білім беру ресурстарына 6,7 мың мектеп қосылды. Бүгінгі таңда бұл ресурсты күн сайын 3 миллионға жуық оқушылар мен мұғалімдер пайдаланады. Цифрлық білім беру ресурстарында барлық сыныптарды қамтитын 50 мыңнан астам бейне сабақтар жарияланды.
