Күздің бірінші айында қазақстандықтардың өмірінде біраз өзгеріс болады деп хабарлайды Kazbusiness.kz
2023-2024 оқу жылында қазақ тілінде оқытатын 1-ші сыныптарда “Әліппе/Ана тілі” пәндері, ал “Орыс тілі” пәні 2-ші сыныптан бастап оқытылады.
Бұл туралы оқу-ағарту министрлігі мәлімдеді.
“Ы. Алтынсарин атындағы Ұлттық білім академиясының ақпараты бойынша, 2023-2024 оқу жылында тілдерді оқытуды кезең-кезеңімен енгізу мақсатында қазақ тілінде оқытатын 1-ші сыныптарда “Әліппе/Ана тілі” пәндері, ал “Орыс тілі” пәні 2-ші сыныптан бастап оқытылады”, – делінген хабарламада.
Ал орыс тілінде оқытатын сыныптарда 1-сынып оқушылары “Қазақ тілі” және “Букварь” пәндерін оқиды.
“Шет тілі” пәні 1-2-сыныптарда емес, 3-ші сыныптан бастап оқытылады.
“Тілдерді оқытуды кезең-кезеңімен енгізу тәсілі өткен оқу жылынан бастап іске асырылуда. Бұл тәсіл білім алушылардың жас ерекшеліктерін ескеруге мүмкіндік беретіні маңызды”, – деді Ы. Алтынсарин атындағы ҰБА президенті Мадина Тыныбаева.
