Ақтаудағы Rixos қонақ үйі мен аквапарктің, сондай-ақ Түркістандағы “Керуен-Сарай” туристік кешенінің құрылысына мемлекеттік бюджеттен ондаған миллиард теңге жұмсалды, деп хабарлайды kazbusiness.kz Tengrinews.kz-ке сілтеме жасап.
Аталмыш жобаларға мемлекеттік қаражат Қазақстандық инвестициялық Даму Қоры (KIDF) арқылы салынған. Қор толықтай мемлекетке тиесілі және Қазақстан экономикасын дамыту үшін инвестициялар тарту мақсатында 2019 жылғы 11 наурызда “Астана” халықаралық қаржы орталығында (АХҚО) тіркелген.
Айта кеткен жөн, KIDF толығымен мемлекеттік болғанымен әрі мемлекеттік қаражатты пайдаланғанымен, Қор жұмсалған ақша туралы есеп бермейді. Іске асырылған жобалар туралы есеп ешқандай мемлекеттік сайтта жарияланбаған.
“KIDF қарауындағы жобалар бойынша ақпарат KIDF-тің шетелдік инвесторлар алдындағы міндеттемелеріне байланысты құпия болып табылады және ұсынылған ақпаратты үшінші тұлғаларға заңсыз ашу шетелдік инвесторларға келтірілген залалды өтей отырып, жауапкершілікке тарту үшін негіз бола алады. Осыған байланысты KIDF тек төменде ұсынылған іске асырылған жобалар туралы ақпаратты ашуға құқылы”, – деп хабарлады Қор ресми жауабында.
Құпиялылыққа сілтеме жасай отырып, KIDF жобалардың құрылысына қанша сома жұмсалғанын айтпаған. Дегенмен, осы жобалардың кредиторы болған Қазақстанның Даму Банкінің сайтында берілген мәліметтерге сүйене отырып, Rixos Aktau мен “Керуен-Сарайға” қанша ақша жұмсалғаны анықталды.
ҚДБ деректеріне сәйкес, 2020 қолданысқа берілген Rixos қонақ үйінің құрылысына – 68,41 млрд теңге жұмсалған. Оның 42 млрд теңгесі банктен кредитке алынған. Қалған 26,4 миллиардты жобалау компаниясының қарапайым акцияларының 49 пайызына иелік ететін KIDF және 51 пайызына иелік ететін Fettaha Taminje берген.
Осылайша, қонақ үй жобасына KIDF 12,94 миллиард теңге, ал Fettaha Taminje компаниясы жеке инвестор ретінде 13,47 млрд теңге жұмсаған.
ҚДБ деректері бойынша банк Rixos жанындағы аквапаркты салуға 16,69 млрд теңге бөлген. Сондай-ақ, KIDF 15,19 млрд теңге, ал Fettaha Taminje 15,81 млрд теңге инвестициялады. Аквапарктың жалпы құны 47,2 миллиард теңгені құрайды.
ҚДБ есебіне сәйкес, “Керуен-Сарай” кешенінің түпкілікті құны 87 миллиард теңгені құрады. Осы соманың 40 миллиард теңгесі банктен несие ретінде алынған. Жоба бойынша акциялардың 47,5 пайызын иеленетін KIDF аталмыш кешенге 22,3 миллиард теңге инвестициялаған, ал Fettaha Taminje компаниясы – 24,7 миллиард теңге бөлген.
