Дамир Әбдіғани Алматыда шағын ғана құмырсқа фермасын ашқан. Жас мирмеколог (құмырсқа зерттеушісі) бұл іспен 13 жасынан бастап айналысады.
Алматылық жігіттің ата-анасы алғашқы кезде баласының ерекше қызығушылығына қарсы болса да, уақыт өте түсіністікпен қарап қолдау көрсеткен.
«Өзінің қызығушылығын басып қоймас үшін баламызға қолдау көрсету жағын ойластырдық. Үйде жәндіктерді асырауға болмайды ғой, сол үшін тігін цехымыздың бір бұрышын баламызға жағдай жасап, өзіне бір құмырсқамен айналысатын бұрыш жасап бердік», – дейді Дамирдің анасы Раушан Әнуарбекова.
Дамирдің шағын фермасында елдегі құмырсқалардан бөлек, тропикалық түрлері де кездеседі. Нақты айтқанда, құмырсқаның оннан астам түрі бар. Бүгінгі күні құмырсқа өсіру Дамир үшін жай ғана хобби емес, жақсы табыс көзіне айналған.
«Құмырсқаларды әр түрлі елдерден аламын. Қытайдан, Австралиядан, Европадан, және оларды көбейтіп, қайтадан Еуропаға, Ресейге сатамын. Себебі ол жақсы табыс көзі. Бір дана құмырсқаны мың долларға сатқан кездерім де болды», – дейді Дамир Әбдіғани.
Құмырсқа сатып алатын шетелдіктер оны көбіне дәрі-дәрімек шығыратын зауыттарға өткізеді. Себебі жәндіктен бөлінетін қышқылдың емдік қасиеті бар екен. Дамирдің айтуынша, құмырсқа өсіру оңай шаруа емес. Оларға қолайлы жағдай жасау керек. Мысалы, бөлмедегі ылғалдылық мөлшері орташа, ал температура +20-22 градустан төмен болмауы керек. Одан бөлек күн сайынғы қорегі бар. Жалпы әлемде құмырсқаның 14 мыңдай түрі бар. Алматылық мирмекологтың есебінше, олардың 150-ге жуық түрі Қазақстанда тіршілік етеді.
