1965 жылы сәуір айының 14-і күні өмірге келген ақжаулықты анамыз Ақсу ауданы Кеңжыра ауылының тумасы. Ақындар елінде өмір есігін ашқан бұрымды 1982 жылы мектеп бітіргеннен кейін Алматы темір жол инженерлерін дайындайтын жоғары оқу орнына түсіп, теміржолшы мамандығын игеріп шыққан.
Әуелде мамандығы бойынша еңбек етіп, Сары Шаған бекетінен бастап, кейінірек Үштөбе, Талдықорған, Боралдай бекеттерінде қызмет істеген.
Ажарлы келіншектің жанарындағы жалынның артында оттың ошағын сөндірмеу, қос бірдей атұстарын жеткізу деген жігер жасырынып тұрған еді. Осы бір алып күші оның өмірдің әр белесінен алып шығып отырды. Өйткені, арқа сүйер азаматынан 1994 жылы айырылған ананың ендігі ойы ұлдарын жеткізу еді.
Шойын жолда шыныққан Бағдат Қожаханқызын өмір шіркін бетке алған бағытының арнасын басқа жаққа бұрғызды.
Оның жаны болаттай бекем, шыдамы темірдей мықты болғанымен денсаулығы өзі талай жылын арнаған темір жолы сияқты берік болмады. Бекеттегі жылдары жастығымен қоса басты байлығында ұрлағандай.
2014 жыл кейіпкердің өмірінде бірталай өзгеріс орын алды. Оның денсаулығы сыр бергендіктен, сол жылы қыркүйек айынан бастап темір жолдағы қызметімен бір жола қоштасады. Осылайша, Талдықорғаннан отбасымен бірге Алматы облысы Қарасай ауданы Исаев ауылына қоныс аударады.
Ердің жасы елуге таяған шағында қолы ұзарып келінді болып, ұлдарын ұясына қондырып, жеке үй жасаған ардақты ананың бұл кездегі міндеті ұрпағының жалғасы, өмірінің мәні, көзінің қуанышына айналған немерелерін өсіруге бағытталды. Алайда, жастайынан еңбекке араласқан кейіпкеріміз үйде қол қусырып қарап отырғанша, немерелеріне арнап түрлі заттарды қолдан жасауға қызығушылық танытқан.
«Жұмыссыз бос отырғым келмей, алғашында немерелеріме арнап көрпеше,ойыншық тіге бастадым.Кейінірек теледидардан «Еңбек» бағдарламасы туралы естіп, жұмыспен қамту орталығына келіп мәлімет алып,іс тігуді кәсіби түрде меңгергу үшін тігіншілер курсына жазылып, үш ай оқып шықтым»,-дейді кәсіпкер.
Тіккен бұйымдар сапалы шығу үшін кәсіби іс машинасы жәнеде басқа керекті құралдарды аламын деген ниетте мемлекеттік грантқа қатыспаққа бел байлайды.
Өзінің айтуынша, бизнес жоба құру керек болған соң, көп ойланып, жаңа туған нәрестелерге арналған бұйымдар дайындау туралы шешімге келеді. Іскер жанның негізгі мамандығы инженер болғандықтан жобаны құру оған оңайға түскенін тілге тиек етті. Осылайша, бизнес-идеяны жүзеге асырмаққа бұйымдар тіге бастаған.
Айы оңынан туған Бағдат апай, нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы бойынша 583 400 теңге көлемінде грант ұтып алып, осылайша басты кәсіпке аяқ басады.
«Негізі бұрын іс тігумен айналыспаған едім,бірақ немерелі болғаннан кейін немерелеріме сапалы заттар алғым келді,ал сапалы заттар көбіне шет ел тауарлары өте қымбат болып келеді, арзан заттардың сапасы төмен,сол кезде босқа отырғанша сол заттарды өзім тігіп көрдім, және таныстарым, туыстарым тіккен бұйымдарыма қызығушылық танытып,сұраныс түсебастаған соң осы кәсіппен айналысу мақсатында 2021 жылдың желтоқсан айында «Нұрайса» деген атаумен жеке кәсіпкер ретінде тіркеліп, өз кәсібімді аштым»,-деп ағынан жарылды.
Жеке кәсібі нағашы апасының құрметіне «Нұрайса» деп аталған. Қазақ, «тектіден текті туады, толқынды толқын қуады» деп бекер айтпаса керек. Нағашысы да өз заманында шебер кісі болған екен. Қолдан алаша тоқып, жіпті қойдың жүнінен иіріп,өзі бояп өрмек құрумен шұғылданған. Бағдат апайдың бойындағы дарыны да әжесінен дарыса керекті. Тіпті өзінің анасы Нұрғазиза да ине-жіпті жанына серік етіпті.
«Анам өзіне және бізге көйлек тігіп беретін, құрақ құрайтын, жас күнімде іс тікпесемде осы кісілерден дарыған болу керек тігінге икемді болып шықтым, жиендерімнің ұзатылу тойларына құрақ көрпе силап жүрдім»,-дейді Бағдат Қожаханқызы.
Балаларға арнап бұйымдар тіккенді жаны сүйетін ардақты әже қара базарда сатылатын банттарға көңілі толмай, мектеп табалдырығын енді аттаған немересіне өзі бантик жасап берген, осылайша, шебердің қолынан шыққан әсем дүниеге туған-туыс, көрші-көлеңнің көзі түсіп, әп-сәтте сұраныста артқан.
Бұдан бөлек, жаңа туылған нәрестелерге арналған көрпешелер, перзентханадан шығарар кезде орайтын конверттерді де асқан талғаммен тігеді. Өзіндік қолтаңбасы бар өнімге қалауыңызша жазуды кесетлеп тіктіртуіге де болады.
Бүгінгі күні өз үйінде кәсібін дөңгелетіп отырған іскер әйел, алдағы уақыттарда үлкен цех ашуды жоспарлап отыр. Тіпті таяу болашақта осы істі жастарғада үйретпек ниетте.
Ол, кәсіппен айналысамын дегендерге мемлекеттен қолдау табылатынын алға тартады. Тек ерінбеу кереек леген оцда. Бастысы мақсатыңа қарай ұмтылсаң үкіметтің өзі үкілеген үмітіңді жалғайды деген сенімде.
