“Яндекс.Такси” жүргізушілері Алматы облысы Қаскелең қаласында наразылыққа шықты, деп хабарлайды kazbusiness.kz.
Бүгін Қаскелең қаласында “Яндекс.Такси” жүргізушілері наразылыққа шығып, сервистегі жұмыстарын тоқтатты. Жүргізушілер сервистің еш себепсіз жұмыс бонустарын қиып, комиссия пайызының тым жоғары екеніне қапалы. Kazbusiness.kz тілшісі ереуілге шыққан бір топ жүргізушілер тобымен кездесіп, олардың пікірін білді.
– “ЯндексPro” компаниясы 16 мамыр күні “Кепілдендірілген жұмыс бонусын” алып тастады. Содан кейін біз сервистің байланыс қызметіне жазып едік, ешқандай жауап ала алмадық. Қазір өте тиімсіз. Сосын бір айтарым – тым болмағанда 1 ай бұрын ескертпеді. Бір күнде бәрін ала салды, – дейді қаскелеңдік жүргізуші.
Сонымен қатар жүргізушілер жұмыс талаптары өзгермейтін болса, сервиске “байкот” жариялаймыз деп отыр.
БАҚ өкілдерінің сауалхатына берген ресми жауабында “ЯндексPro” компаниясы сервистің қалыпты жағдайды жұмыс істеп тұрғанын айтады.
“Сервис әдеттегідей жұмыс істеп тұр. Тарифтер мен комиссия өзгерген жоқ. Бізде серіктестер мен олардың жүргізушілеріне арналған мотивациялық бағдарламалар бар. Жақын күндері біз бағдарламалардың шарттарын жаңарттық. Жүргізушілер белгілі бір тапсырыстарды орындау арқылы орташа кірісті арттыруға мүмкіндік алды. Біз Қаскелеңдегі серіктестермен байланыстамыз, мотивациялық бағдарламалардың өзгеруі бойынша кері байланыс орнатып жатырмыз”, – делінген хабарламада.
“Яндекс.Такси” қызметінің бірнеше күнге тоқтауы қаскелеңдік тұрғындарға да кесірін тигізген. Тұрғындар қала ішінде жұмыс істейтін жалғыз сервис қызметіне жүгіне алмай отыр. Сондай-ақ қаскелеңдіктер такси қызметінің күрт қымбаттауына да наразы.
– Бұл жағдайдың қарапайым тұтынушы ретінде маған да кесірі тиіп жатыр. Қаскелең ішінде жақын жерге ешкім 350 теңгеге бармайды. Бірден 600-700 теңге боп кетті. “Яндекс” осы уақытқа дейін өз мүмкіндіктерін пайдаланып қаладағы басқа шағын такси қызметтерін ығыстырып тастады. Енді жалғыз сервис болғансын өз күшін пайдаланып отыр. Компания бұл жағдайды өзгертпесе, өздеріне де, тұтынушы бізге де жақсы емес, – дейді Қуандық есімді тұрғын.
Айта кеткен жөн, бұған кейін Талғар қаласында да “Яндекс.Такси” жүргізушілері жиналып, Еңбек және әлеуметтік қорғау министрлігіне, сондай-ақ Алматы облысының монополияға қарсы комитетіне бейнеүндеу жолдаған болатын.
