Алматы қаласы Кәсіпкерлік және инвестициялар басқармасы біздің кәсіпкерлерді қолдауға арналған бағдармалар жөнінде сұрауымызға жауап берді. Басқарманың ресми жауабында Алматы қаласында бизнесті қолдау және дамыту бойынша мемлекеттік және өңірлік бағдарламалар іске асырылып жатқаны айтылған.
— «Кәсіпкерлікті дамыту жөніндегі ұлттық жоба» шеңберінде жылдық 6% бойынша ең жоғары сомасы 3 млрд. теңгеге дейінгі сыйақы мөлшерлемесінің бір бөлігін субсидиялау мүмкіндігі көзделген. Ұлттық жобаның өңірлік үйлестірушісі, яғни Алматы қаласының кәсіпкерлік және инвестициялар басқармасы жыл сайын экономиканың басым салаларында шағын кәсіпкерлік субъектілері үшін өтеусіз негізде 5 млн. теңгеге дейін мемлекеттік гранттар беру бойынша конкурс өткізеді – деп хабарлайды қалалық басқарма.
Сондай-ақ, Кәсіпкерлік және инвестициялар басқармасының мәліметінше, Алматы қаласының әкімдігі «Almaty Business – 2025» кәсіпкерлікті дамытудың өңірлік бағдарламасын әзірлеген. Осы бағдарлама шеңберінде «Almaty Finance» ЖШС және «Almaty «МҚҰ»» ЖШС компаниялары құрылып, онда 500 млн.теңгеге дейінгі сомада жылдық 2%, 6% және 12% жобаларды қаржыландырудың сараланған тәсілі қолданылады.
Оған қоса, Алматы қаласының әкімдігі «JANA BUSINESS» өңірлік бағдарламасын («Даму» кәсіпкерлік дамыту Қорымен бірлескен бағдарлама) іске асырып жатыр. Субъектілер үшін қарыз бойынша сыйақының номиналды мөлшерлемесі жылдық 6%-дан аспайды, қарыздың ең жоғары сомасы – 100 млн.теңге.
«Жалпы, 2022 жылы мемлекеттік және өңірлік бағдарламалар (Ұлттық жоба, Қарапайым заттар экономикасы, АӨК, «Алматы бизнес – 2025», «Жаңа бизнес») шеңберінде 48,1 млрд. теңге бюджет қаражаты бөлінді. Жалпы сомасы 131,5 млрд. теңгеге 3 448 ШОБ жобасы қаржыландырылды»а – делінген басқарма жауабында.
Сонымен қатар, Алматы қаласы Кәсіпкерлік және инвестициялар басқармасы кәсіпкерлерге консультациялық қызмет алу үшін келесі мекен-жайға баруды ұсынады:
«Кәсіпкерлер толық консультациялық қызметті тегін «Qoldaý» кәсіпкерлік орталығынан, Алматы қаласы, Байзақов көшесі, 303, 2 қабат мекенжайы бойынша ала алады».
