Ұлттық экономика министрі Әлібек Қуантыров мәжіліс отырысындағы үкімет сағатында алдағы бес жылдағы инфляция қандай болатынын мәлімдеді, деп хабарлайды kazbusiness.kz ақпараттық порталы.
Әлібек Қуантыров мәжілістің жалпы отырысында 2023–2027 жылдарға арналған әлеуметтік-экономикалық даму болжамы туралы баяндама жасады. Болжам 2021 жылы экономиканың өсуі бойынша қорытынды деректерін, халықаралық қаржы ұйымдарының әлемдік экономиканың өсуі мен экспорттық тауарлар бағасын ескере отырып жасалған.
“Бұл ретте халықаралық қаржы ұйымдарының консенсус-болжамына сәйкес 2022 жылы мұнайдың әлемдік бағасы барреліне 104,2 АҚШ доллары деңгейінде күтілуде. 2023 жылы әлемдік экономиканың өсуі 3%-ды құрайды. Болжам мен бюджеттік параметрлерді қалыптастырудың негізі ретінде базалық сценарий алынды. Осы сценарий бойынша мұнайдың орташа бағасын барреліне 85 $ деңгейінде қалыптасады. Жалпы ішкі өнімнің орташа жылдық нақты өсуі 3,9%-ды құрайды”, – деді ол.
Оның айтуынша, инфляция 2023 жылы 7,5 – 9,5 % деңгейінде, 2024 жылы – 4-5%, 2025 – 2027 жылдары 3-4% деңгейінде белгіленді.
Жалпы ішкі өнімнің нақты өсуі 2023 жылғы 4,0%-дан 2027 жылы 4,2%-ға дейін жеделдетіледі деп күтілуде. Номиналды жалпы ішкі өнім 120,7 трлн теңгеден 176,6 трлн теңгеге дейін өседі.
“Мұнай өндіру 2023 жылы 92,6 млн тоннаны құрап, 2027 жылы 99,9 млн тоннаға дейін ұлғаяды. Ұлттық Банктің болжамы бойынша экспорт 80,9 млрд АҚШ долларынан 84,6 млрд АҚШ долларына дейін, импорт 45,7 млрд АҚШ долларынан 53,5 млрд АҚШ долларына дейін өседі”, – дейді министр.
Сондай-ақ ұлттық банк төрағасы Ғалымжан Пірматовтің айтуынша, Қазақстанда жылдық мәнде инфляция 17,7%-ке жеткен. Бұған азық-түлік бағасының 22,2%-ке өсуі айтарлықтай үлес қосып отыр.
“Азық-түлікке жатпайтын инфляция да импорттық тауарлардың қымбаттай түсуінен және оларға сұраныстың жоғары болуынан 17%-ке дейін қарқын алды. Ақылы қызмет инфляциясы 12,3%-ті құрады. Қыркүйек айындағы сыртқы шоктарды ескерсек, осы жылдың соңына қарай инфляция біздің тамыз айындағы болжамымыздан асып түседі. Қазір іске асырылып жатқан ақша-кредит саясаты аясында 2023 жылы инфляция біртіндеп 7,5-9,5%-ке дейін баяулайды. Әлемдегі азық-түлік бағасы өсімінің баяулауы, негізгі сауда әріптес елдердегі инфляцияның баяулауы да инфляцияны тежейді”, – деді Пірматов.
Оның айтуынша, 2022 жылдың соңына қарай инфляция тамыз айындағы болжамнан асып түседі.
“Қазір іске асырылып жатқан ақша-кредит саясаты аясында 2023 жылы инфляция біртіндеп 7,5-9,5%-ға дейін баяулайды. Әлемдегі азық-түлік бағасы өсімінің баяулауы, негізгі сауда әріптес елдердегі инфляцияның баяулауы да инфляцияны тежейтін болады. Шикізат бағасы жоғары болған жерде 2022 жылы төлем балансының ағымдағы шоты профицитке ауысып, 2023 жылы профицит сақталады деп күтіледі”, – дейді Ұлттық банк төрағасы.
