Жас кәсіпкерлердің шамамен 9%-ы кәсіпорын иелері, ал 91%-ы жеке кәсіпкерлер, деп хабарлайды kazbusiness.kz.
Экономикалық зерттеулер институтының мәліметінше, 2022 жылдың соңында Қазақстанда 30 жасқа дейінгі жастардың басшылығымен 400 мыңға жуық бизнес субъектісі жұмыс істеді. Сондай-ақ, өткен жылы “Даму” Қоры көмегімен жас кәсіпкерлерге жалпы сомасы 61,3 млрд теңгені құрайтын 3 827 жобаға қолдау көрсетілді.
Жалпы жас кәсіпкерлер мен іскер әйелдер арасында сауда саласы ерекше танымал (41,9%). Ал заңды тұлға мәртебесіндегі кәсіпкерлер негізінен құрылыс (15,9%) және кәсіби, ғылыми және техникалық қызметпен (5,9%) айналысады.
Жас кәсіпкерлердің ең көп бөлігі Алматы қаласында шоғырланған – 66 мың немесе жалпы жас кәсіпкерлердің 16,7%-ы. Екінші орында Астана қаласы – 45 мың жас кәсіпкер немесе 11,4%. Халық тығыз қоныстанған Түркістан облысында жасы 30-ға дейінгі жеке кәсіпкерлер бизнес иелерінің 10%-дан астамын (41 мың) құрайды. Жас кәсіпкерлер саны бойынша тізімнің 4 және 5 орындарында Шымкент қаласы (35 мың) мен Алматы облысы (25 мың) орналасқан.
