Ұлттық статистика бюросы Қазақстанда ең көп жалақыны кімдер алып жүргенін мәлімдеді.
Айта кетейік, бюро жыл сайын “Жалақы құрылымы және оны бөлу туралы есеп” статистикалық нысаны негізінде кәсіпорындарға зерттеу жүргізеді. Есепті жылдың сәуір айында толық жұмыс істеген барлық қызметкерлер зерттеуге жатады.
Осылайша, бюро жүргізген статистикаға сәйкес, 2021 жылдың қорытындысы бойынша ең жоғары жалақы:
- “Азаматтық құрылыс” саласындағы басқарушыда (коммерциялық қызметте) – 4,5 млн теңге;
- “Шикі мұнай және табиғи газ өндіру” саласындағы бас директор – 3,9 млн теңге;
- “Автомобильдер мен мотоциклдер саудасынан басқа көтерме саудада сату” саласындағы инвестициялық жобалар жөніндегі директоры – 3,9 млн теңге;
“Назар аударамыз, жалақы мөлшері лауазымға және экономикалық қызмет түрі, аймақ, біліктілік, жұмыс өтілі және басқалары сияқты маңызды факторларға байланысты”, – деп жазылған ведомство хабарламасында.
Сонымен, ең жоғары айлықтың көлемі 3,9 млн теңгеден басталады десек, оны алатындардың еңбекке жарамды халықтың ішіндегі үлесі 0,1 пайызға да жетпейтін көрінеді.
“2021 жылғы зерттеу қорытындысы бойынша зерттеуге қатысатын адамдардың жалпы санынан 3,9 млн теңгеден астам жалақыны 0,1% төмен адам алды. 275 мың теңгеден астам жалақыны 28,4% адам алды”, – деп жазады Ұлттық статистика бюросының мамандары.
Еске салсақ, бұған дейін бюро қазақстандықтардың орташа жалақысы 312 мың теңгеден асқаны туралы мәлімет таратқан еді.
