ҚР Еңбек және халықты әлеуметтік қорғау министрлігі жыл басынан бері көпбалалы отбасыларға, орта есеппен 535,3 мың отбасыға 66,9 млрд теңге мөлшерінде мемлекеттік жәрдемақы төленгенін хабарлады. Оның ішінде ақпан айында 538 мың отбасына 33,8 млрд теңге мөлшерінде жәрдемақы төленген, деп хабарлайды kazbusiness.kz.
Бұл мемлекеттік жәрдемақыға 4 және одан да көп бірге тұратын кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады.
Төлем мөлшері бала санына қарай есептеліп төленеді:
- – 4 баласы бар отбасыларға – 16,03 АЕК немесе 55 304 теңге;
- – 5 балаға – 20,04 АЕК немесе 69 138 теңге;
- – 6 балаға – 24,05 АЕК немесе 82 973 теңге;
- – 7 балаға – 28,06 АЕК немесе 96 807 теңге;
- – 8 және одан да көп баласы бар отбасыларға – әр балаға 4 АЕК немесе 13 800 теңге мөлшерінде төленеді.
Айта кеткен жөн, көпбалалы отбасыларға олардың табысын есепке алмай берілетін мемлекеттік жәрдемақы Қазақстанда 2020 жылдың 1 қаңтарынан бастап атаулы әлеуметтік көмек көрсетудің жаңа тетіктерінде көзделген табысы аз және көпбалалы отбасыларды қолдаудың үш негізгі бағыты аясында енгізілген.
Сондай-ақ 2023 жылғы 1 қаңтардан бастап балалы отбасыларға тағайындалатын мемлекеттік жәрдемақылардың мөлшері 8,5%-ға артқан.
