Қонаев қаласында өткен кездесуге “Жетісу Вольфрамы” ЖШС жобасын іске асыруға инвестиция салатын гонконгтық “Jiaxin International Resources Investment Ltd”компаниясының өкілдері де қатысты. Бүгінгі таңда Еңбекшіқазақ ауданында орналасқан Бұғыты вольфрам кен орнында зауыт құрылысы жүріп жатыр. Кездесу барысында жобаны іске асырудың алдағы жоспарлары талқыланды.
Атап айтқанда, инвесторлар жалпы құны 270 миллион АҚШ долларын құрайтын негізгі кәсіпорынды салу кезінде кадрларды даярлау және еңбек мигранттарының үлесін арттыру мәселелерін көтерді.
Облыс әкімі Марат Сұлтанғазиев бұл мәселе ел заңнамасында көрініс тапқанын және квотаны ұстану қажеттігін еске салды.
“Сіз өндірісті келесі жылы іске қосуды жоспарлап отырсыз. Бұл кадрларды даярлау жұмыстары бүгін жүргізілуі тиіс дегенді білдіреді. Сіз бұл жұмысты тиісті деңгейде жүргізбейсіз. Бұл үдерісті жеделдету қажет”, – деді облыс әкімі.
Компания өкілдері ковидтік шектеулерді алға тарта отырып, ескертуге келісті және бастапқыда жұмысшыларды Қытайға оқуға жіберу жоспарланғанын түсіндірді.
Бұдан басқа, өңір басшысы жұмысшыларды азық-түлікпен қамтамасыз ету және киім-кешек саласында қазақстандық компаниялармен ынтымақтасу қажеттігін атап өтті.
Лю Фан Юнь бұл ұсыныспен келісіп, жақын арада аталған бағыттағы жұмыс жолға қойылатынын атап өтті.
“Құрылыс аяқталғаннан кейін зауыт 1000 тұрақты жұмыс орнын қамтамасыз етеді. Біз оқытуға дайынбыз және өндірістік практикадан өту үшін зауыттан жұмысшылардың бірінші тобын ҚХР-ға жібергіміз келеді. Бұдан басқа, біз бизнестің әлеуметтік жауапкершілігі бойынша тұрақты негізде жұмыс жүргізетін боламыз”, – деп сендірді Лю Фан Юнь.
