Алматы облысы аграрлы аймақ болғанымен ауыл шаруашылығындағы өсім көңіл көншітпейді. Бұл туралы облыстық әкімдікте өткен мәжілісте мәлім болды.
Облыстық Экономика және бюджеттік жоспарлау басқармасының басшысы Аслан Ораздың айтуынша, ауыл шаруашлығы саласында өсім бар-жоғы 0,1 %-ды құраған. Төмен нәтижеге әкеліп соққан басты себеп, өсімдік шаруашылығына тиесілі өнімнің 1,7%-ға азаюы.
Ауыл шаруашлығындағы жағдай мәз емес. Біріншіден, егістік алаңдары 3,1 мың гектарға қысқарып, дәнді дақылдардың жалпы түсімі 2021 жылдың деңгейінде қалған. Екіншіден, облыста 74 жылыжайдың 16-сы жұмыс істемей тұр.
Күрмеуі тарқатылмаған мәселе мұнымен таусылмақ емес, таяқтың келесі ұшы аймақтағы көкеніс қоймаларына тіреледі. Бүгінгі таңда облыста жалпы сыйымдылығы 129,3 мың тонна болатын 73 көкөніс қоймасы бар. Алайда, оның жартысынан көбі Еңбекшіқазақ және Іле аудандарында, ал қалған аудандарда қоймалар тапшы болып тұр.
Сондықтан облыстағы азық-түлік бағасын тұрақтандыру және дихандарды ынталандыру мақсатында қосымша көкөніс қоймаларын әр ауданда көптеп ашу қажеттілігі туындап отыр.
Аслан Ораздың айтуынша, осы жіберілген кемшіліктердің салдарынан өңір аграрлық секторда өндірілген өнім көлемі жағынан республикада 5-ші орында тұрсақта, өсім қарқыны бойынша республикада 15 орынға түскен.
