“Ansar foods” кәсіпорны Алматы облысы Қарасай ауданына қарасты Алмалыбек ауылында орналасқан. Компания қысқа уақыт ішінде аймақтағы макарон өнімдерін шығаратын ірі кәсіпорынға айналды. Фабрикада 21-ден аса өнім түрі шығарылады. Өнімділік қуаты жылына 2,5 мың тонна, деп жазады kazbusiness.kz тілшісі.
Аталған кәсіпорын әлеуметтік маңызы бар азық-түлік тізбесіндегі өнімдердің бірі, көпшілік күнделікті тұтынып жүрген «Cezaro» макарон өнімдерін шығарып, облыс, қала халқын қамтып отырған алып өндіріс ошағы.
Кәсіпорын 2013 жылы “Cezaro” жеке кәсіпкерлігі болып Алмалыбек ауылында ашылды. Кәсіпкер Жандос Серікбаев басшылығының арқасында шағын бизнес бүгінде алпауыт кәсіпорынға айналды.
Айта кетерлігі, Жандос Медеуұлы италиялық ItalPasta маркалы кеспе шығаратын бір станок және екі кептіру камерасынан бастаған еді.
“Ашылғанда алдымызға италяндық технология бойынша сапалы кеспе өндірісін міндет ретінде қойдық. Одан бөлек өндірілетін кеспенің стандарттарға сәйкес әрі тұтынушының көңілінен шығу жағын да ойладық. Cezaro кеспелері көп көңілінен шыға бастаған соң шағын кәсіпті кеңейтуді қолға ала бастадық. Осылайша 2014 жылдан бастап отандық және ресейлік дистрибьюторлармен келісімшартқа отырдық”, – дейді Жандос Медеуұлы.
Бүгінде кәсіпорын 60 адамды жұмыспен қамтып отыр. Жыл сайын өнімнен бөлек, цехты да кеңейтіп, құрал-жабдықтар санын арттыруды да қолға алған. Осылайша өндіріске қажетті құрал-жабдықтар мен кептіру камераларының саны артты.
“2020 жылы жеке кәсіпкерлік атауын “Ansar foods” ЖШС деп ауыстырдық. Одан бөлек сол жылы құрал-жабдықтарды жаңалап, макарон өнімдерін шығаратын екі ItalPast линиясын сатып алдық. Өндіріс көлемі болса жылына 2,5 мың тоннаға дейін ұлғайды”, – дейді кәсіпкер.
Мемлекеттің қолдауынсыз жетістікке жеткен кәсіпорын аумағы 80 соты жерді алып жатыр. Өндіріс аумағы 1500 шаршы метр болса, қоймалар 1000 шаршы және 200 шаршы метрде кеңсе орналасқан.
Сондай-ақ Жандос Медеуұлы келер жылғы жоспарымен де бөлісті. Айтуынша, өндіріс көлемін жылына 10-15 мың тоннаға дейін арттыруды көздеп отыр. Ол үшін индустральды аймаққа көшуді жоспарлап отыр.
“Желтоқсан айында отандық өнім “Жайма”-ны шығара бастадық. Сатуды 15 желтоқсаннае бастап кеттік”, – деген Жандос Медеуұлының айтуынша компания өнімдері Қазақстаннан бөлек, Ресей, Қырғыстанға экспортталады.
Ресей мемлекетіне 15 дистрибьюторға және отандық 15 дистрибьюторға өнім жеткізіледі. Ал Қырғыстанға бір отандық дистрибьютор.
“Біз әрдайым серіктестік желісін ұлғайту мәселесін назардан тыс қалдырмаймыз. Сондай-ақ аймақтық сауда желісін дамытуды да қарастырамыз. Компанияның алдағы 3 жылға жоспарында Өзбекстан, Грузия, Украина, Түркіменстан және Қытай нарығына шығу. Бүгінде біздің өнімді елдің 500 сауда нүктесінен және 500 желілік сауда дүкендерінен табуға болады”, – дейді Жандос Медеуұлы.
Өнімді:
- Magnum
- Small
- АДК
- Carefood
- Metro
- Toimart дүкендер желісінен табуға болады.
Қазіргі уақытта макарон өнімінің 21 SKU немесе Cezaro кеспесінің 8 түрі өндіріледі. Яғни:
- «Экспресс»;
- «Волнистая»;
- «Домашняя»;
- «Лагманная»;
- «Керемет»;
- «Классическая»;
- «Суповая»;
- «Восточная».
Өнімдер 250, 300, 350, 500, 1000 грамдық қаптамада шығарылады. 2023 жылы ассортимент көлемін 30-ға дейін арттыру жоспарда. Сонымен қатар 2022-2024 жылдар аралығында “Эконом” сегментінде өнім түрін шығаруды көздеп отыр.
2022 жылғы өндірістік базасы:
- Жылына 2000 тоннадам астам өнім шығаратын ItalPast өндірістік желісі;
- Тереңдігі 155 метр болатын Қаскелең су кен орнының суы;
- Ұңғымадан тәулігіне 3 м3 дейін суды тазартатын заманауи су дайындау жүйесі
немесе су магистралі; - Тәулігіне 6 тоннаға дейін жартылай фабрикатты макарон өнімдерін кептіруді қамтамасыз ететін итальяндық өндірістің 10 кептіру камерасы;
- Ауданы 500 м2 асатын дайын өнімді қоймада сақтау.
Айта кетерлігі, компания кәсіпкердің жеке қаражатына құрылған. Ешбір қолдаусыз, мемлекет грантынсыз айналымдағы қаражатты орынды жаратудың нәтижесінде бүгінгі жетістікке жеткен.
