Елімізде бір миллионнан астам азамат банктерге 1 триллион теңгеден аса ақша қарыз, деп хабарлайды kazbusiness.kz.
Ал бұл жеке тұлғалар өздерін банкрот деп жариялайтын болса болжамды түрде жергілікті бюджет үш жылға 100 миллиард теңге жоғалтуы мүмкін. Ал қаржы министрлігіндегілер бұл мемлекет қазынасына кері әсер етпейді деп отыр.
ЕРЖАН БІРЖАНОВ, ҚР Қаржы вице-министрі:
– 1 триллион қарызды 10 пайызға көбейтетін болсақ, 100 млрд соманы құрайды. Бірақ бұл болжамды сома деп айта аламыз. Себебі қазір бұл азаматтар өздерінің бастапқы қарыздарын өтей алмай отыр. Салық төлеу екінші сұрақ қой. Сондықтан бұл жергілікті бюджетке кері әсер етеді деп ойламаймын.
Өйткені өзін банкротты деп танығысы келген азаматтардың барлығының бірдей өтініші қабылданбауы мүмкін. Айта кетейік, банктерге несиесін төлей алмай жүрген тұрғындардан 3 наурыздан бастап өтінім қабылданатын болады.
Сондай-ақ, министрлік өкілдері банкроттық ол амнистия емес екенін ескертеді. Яғни кредиті кешірілген жеке тұлғалар бірқатар шектеулерге тап болады. Мәселен, банкрот болған азаматтар 5 жыл несие ала алмайды. Және өзін тек жеті жылдан кейін ғана қайта банкрот деп жариялай алады.
