WhatsApp әлеуметтік желісі арқылы “Астанада COVID-19 жаңа белгілері тіркеліп жатқаны туралы” хабарлама тарай бастады. Бұл жолы аурудың белгілері – іріңді жөтел және диарея. Ақпаратқа қатысты ҚР Денсаулық сақтау министрлігі түсініктеме берді, деп хабарлайды kazbusiness.kz ақпарат агенттігі.
Ведомствоның хабарлауынша, елімізде COVID-19 таралуы бойынша тұрақты жағдайға жетті. Барлық өңір “жасыл” аймақта, ал карантиндік шектеулер алынып тасталды. Дегенмен, инфекцияның жекелеген жағдайлары әлі де тіркелуде.
“Біз COVID-19 коронавирустық инфекциясы жойылмағанын түсінуіміз керек. Вирус әлі де таралуда. Бірақ аурудың салыстырмалы түрде жеңіл ағымын ескере отырып, оның таралуын бақылау басқа вирустық инфекциялармен қатар жүріп жатыр. Айта кету керек, ірің бөлінетін жөтел және диарея коронавирустық инфекция белгісі емес. Әдетте, инфекция жұқса, жөтел құрғақ сипатта болады. Аурудың жеңіл ағымына байланысты халық медициналық көмекке сирек жүгінуде”,-деп хабарлады ҚР Денсаулық сақтау министрлігінің баспасөз қызметі.
Stopfake.kz порталының мәліметінше, “іріңді жөтел және диарея симптомдары бар COVID-19 ауыр түрі тарап жатыр” деген ақпарат шындыққа жанаспайды.
