Қазақстандағы ауыл шаруашылығы инфрақұрылымының 80 пайыздан астамы ескірген. Мұндай дерек ашық талқыға шығарылған Қазақстанның 2060 жылға дейін көміртегі бейтараптығына қол жеткізу туралы стратегиясының құжатында келтірілген.
«Ауыл шаруашылығы секторы климаттың ықпалына бейім. Климаттың өзгеруі Қазақстандағы жауын-шашын мен биомдардың құрылымына ықпал етеді, экстремалды ауа райы құбылыстарының жиілігі мен қарқындылығы артады, орташа температура жоғарылайды және суаруға арналған судың қолжетімділігі төмендейді. Қазіргі уақытта ауыл шаруашылығына ұлттық су тұтынудың 3/2 тиесілі. Климаттың өзгеруі көптеген дақылдардың және барлық дерлік аймақтардың өнімділігінің өсуіне теріс әсер етуі мүмкін.
Ауыл шаруашылығын дамыту басты басымдықтардың бірі саналады. Өйткені, ол жұмыспен қамтуда, әсіресе ауылдық жерлерде, сондай-ақ әлеуметтік және азық-түлік қауіпсіздігіне байланысты маңызды рөл атқарады. Алайда, қаржыландыруға қолжетімділіктің шектеулі болуы көптеген фермерлерге өнімді және тұрақты ауылшаруашылық секторын дамытуға кедергі келтіреді. Ауыл шаруашылығы инфрақұрылымының 80%-дан астамы ескірген. Қазіргі уақытта Қазақстандағы ауыл шаруашылығы жерлерінің тек 1%-ы ғана органикалық ауыл шаруашылығына бөлінеді», – деп көрсетілген құжатта.
Ел Үкіметі ұсынған Стратегия құжатында аталған мәселелерді шешудің бірнеше жолы көрсетілген. Оның бірі – ауылшаруашылық қалдықтарынан биоэнергия өндіру әлеуетін барынша пайдалану. Тиісінше биогазды жылу және электр энергиясын өндіруде қолдану жоспарланып отыр. Оның нәтижесінде ауаға бөлінетін парниктік газ қалдықтарының көлемі азаяды. Сонымен қоса, егін шаруашылығын дамытуда климаттың өзгеруіне тез бейімделетін дақылдарды енгізу көзделеді.
Тоқтала кетсек, бекітілуі мүмкін Стратегияның мақсаты – тиімді әрі төмен көміртекті даму моделін құру, балама көздерді енгізу. Атап айтқанда, қазба энергия ресурстарын жағу көлемін азайтып, тиісінше тиімді технологияларды қолдану. Ол үшін қалалар мен өңірлерге және түрлі бизнес салаларын қоса алғанда, экономикаға жасыл инвестицияларды тарту жоспарланған. Құжатта көрсетілгендей, аталған жұмыстарды кезең-кезеңімен орындай отырып, еліміз 2030 жылға қарай ауаға бөлінетін парниктік газ қалдықтарын 15 пайызға төмендетеді. Ал 2060 жылға дейін көміртегі бейтараптығына қол жеткізеді.
