Көксу ауданында соңғы 9 айда 24,2 млрд. теңгенің ауыл шаруашылық өнімі өндірілді. Бұл туралы Жетісу облысының ақпараттық алаңындағы баспасөз мәслихатында аудан әкімі Мәрлен Қапашұлы мәлімдеді, деп хабарлайды kazbusiness.kz сайты.
Бүгінгі күні аудандағы ауылшаруашылығының егістік көлемі 31710 гектарды құрады. Қазіргі кезде 9790 гектар дәнді дақылдар жиналып қамба 23,9 мың тонна астықпен толықты. Орташа өнімділігі гектарына 24,4 центнер құрады.
Өңірдегі негізгі табыс көзі – қант қызылшасы. Аймақта ерте көктемде 1200 га қант қызылшасы себілген болатын, қазіргі таңда тәтті түбірді жинау науқаны басталды.
Зауыт ағымдағы жылдың 27 қыркүйегінен қант қызылшасын қабылдауды бастап, өңдеу жұмыстарына кірісіп кеткен екен.
«Биылғы жылы зауыт 200 мың тоннадан астам қант қызылшасын қабылдауды жоспарлап отыр. Және зауыт 1 тонна қант қызылшасын 30 мың теңгеден қабылдайды, оның сыртында қосымша тасымалдау жол ақысы төленеді»,-деп атап өтті аудан әкімі Мәрлен Көлбаев.
Айта кетейік, ауданда дәнді, жүгері, майлы дақылдар және картоп жиналып жатыр, осылайша аймақтағы егіс басындағы жұмыстар қыза түскен. .
Өнеркәсіп саласына келер болсақ, Көксу қант зауыты ағымдағы жылдың сәуір-қыркүйек айында 18 млрд. теңгеге 48 мың тонна қамыс қантын өндірген. Қазан-желтоқсан айларында қант қызылшасынан 24 мың тоннадай қантты өндеу көзделуде.
Аудан әкімінің айтуынша, майбұршақ өндейтін Уызмайиндастри зауты 4,2 млрд. теңгеге 8,6 мың тонна өнім шығарса, “Строитель” ЖШС-гі 1 млрд. теңгеге 25,6 мың тонна құрылыс материалдарын өндірді.
Шағын және орта бизнестеде дамудың оң динамикасы сақталған. Қазір ауданда осы салада 5687 адам жұмыс жасайды.
Есепті кезеңде шағын кәсіпкерлікте өндірілген өнім және көрсетілген қызмет көлемі 5 млрд. 241 млн. теңгегені құрап, бюджетке 426 млн. теңге салықтық түсімдері түскен
Сонымен қатар кәсіпкерлікті дамытудың 2021-2025 жылдарға арналған Ұлттық жобасы аясында жұмысқа орналасуға ниет білдірген 1753 жұмыссыздың 1189-сі жұмысқа орналастырылды.
2021 жылдың қорытындысы бойынша жалпы жұмыссыздық деңгейі 4,9 % құрап отыр.
