Еліміздің тау-кен өнеркәсібіне инвестиция тарту Лондонда өтіп жатқан Қазақстан-Британ бизнес форумының басты тақырыбына айналды, деп хабарлайды kazbusiness.kz.
Бейсенбі күні өткен шараға қазақстандық және британдық бизнес өкілдері, мемлекеттік органдар, квазимемлекеттік сектор өкілдері, сарапшылар мен дипломаттар қатысты.
Қазақстанның Ұлыбританиядағы Елшісі Мағжан Ілиясов форумға қатысушыларға шетелдік инвесторларды қолдаудың мемлекеттік бағдарламалары және ҚР экономикасына инвестициялар тартуды ынталандырудың жаңа шаралары туралы айтты.
Қазақстандық дипломат жоғары қайта өндіруге инвестиция салатын британдық компаниялар барынша қолдау алатынын атап өтті.
«Біздің мақсатымыз шикізатты жеткізу, сондай-ақ Қазақстанда дайын өнімді өндіру, бұл әрі әріптестігімізді теңдестіреді», – деді Мағжан Ілиясов.
Ол Қазақстан инвесторларды ынталандыру бойынша өңірдегі ең тартымды шараларды, соның ішінде «Астана» халықаралық қаржы орталығының платформасы аясында ашық бизнес пен кепілдіктер үшін дәлелденген платформаны ұсынып отырғанын атап өтті.
Форумның ашылуында сөз алған Ұлыбританияның бизнес және сауда жөніндегі мемлекеттік министрі Нусрат Гани Қазақстанның минералдық базасының британдық бизнес үшін тартымдылығын айтты.
2040 жылға қарай аккумулятор өндірісінің негізі саналатын литий, графит, кобальт және никель сияқты қатты пайдалы қазбаларға әлемдік сұраныс 13 есе өседі, ал бұл ретте Қазақстан Ұлыбританияның қажеттілігін қанағаттандыра алады.
«Біз бұл салада тамаша серіктеспіз, өйткені Ұлыбританияда әлемдегі жетекші консалтингтік компаниялар мен тұрақты тау-кен технологиялары орналасқан», – деген Нусрат Гани Қазақстанның минералды шикізаты негізінде жаңа технологияларды әзірлеуді ұсынды.
Қазақстанның Ұлттық геологиялық қызметі британдық серіктестермен еліміздің минералдық байлығын игеруді жеделдетіп, қазақстандық жер қойнауын инвестициялау әлеуетін ашуға мүмкіндік беретін озық халықаралық тәжірибе алмасу бойынша келіссөздер жүргізіп жатыр.
Қазақстан мен Ұлыбритания арасындағы сауда-инвестициялық әріптестіктің перспективалы бағыттарының бірі бүгінгі таңда британдық индустрияның өткір тапшылығын сезініп отырған маңызды пайдалы қазбаларды бірлесіп өндіру және өңдеу болуы мүмкін.
Олардың қатарында заманауи технологияда қолданылатын және ұлттық қауіпсіздік пен экономикалық өркендеу үшін маңызды металдар мен сирек кездесетін элементтер бар.
Екі панельдік талқылау барысында форум спикерлері, олардың арасында Rio Tinto, KAZ Minerals, Ferro-Alloy Resources, Британдық геологиялық қызметтің тау-кен компанияларының басшылары Қазақстанның инвестициялық тартымдылығын, пайдалы қазбаларды барлау мен өндірудің ағымдағы тәжірибесін, саланы қолдау тәсілдерін және өнімді Еуропаға жеткізу бағыттарын талқылады.
ҚР Индустрия және инфрақұрылымдық даму министрлігі Геология комитеті төрағасының орынбасары Галан Ғалиев форумға қатысушыларды Қазақстанның минералдық-шикізат базасының жай-күйі, қатты пайдалы қазбалар қорларының еліміздің өңірлері бойынша бөлінуі, Ұлттық геологиялық қызметтің заңнамасы мен міндеттері туралы хабардар етті.
Наурызда Ұлыбритания парламентінің сыртқы істер комитетінің тыңдауында сөйлеген сөзінде Джефф Таунсенд Британдық депутаттарға маңызды пайдалы қазбалар саласындағы ынтымақтастық тұрғысынан Ұлыбритания бүгінде әлемнің 5 мемлекетіне ғана сене алатынын түсіндірді, олардың арасында Қазақстан ерекше орын алады.
