ҚР Оқу-ағарту министрі Ғани Бейсембаев азаматтар тарапынан мектептегі ақша жинау туралы күнделікті шағым алатынын айтады, деп хабарлайды kazbusiness.kz.
– Жеке парақшама күнде хабарлама келеді. “Сіз ақша жинамау керек деп айтып жатырсыз, бірақ кейбір белсенді ата-аналар мен мұғалімдер, сынып жетекшілері директормен бірге бұл мәселеге пысқырып қарамайды” деген шағым түседі. Тіпті дыбыс хабарлама да жібереді. Оны тыңдап отырып, кәдімгідей қатты ұяламын. Хабарламада “Иә, министрліктен ақша жинамасын деген бұйрық бар, бірақ ол бұйрыққа қарамаңдар, біз бәрібір жинаймыз. 5-10 мың теңгені аяйсыңдар ма?” деп оқушыларына дүрсе қоя берген мұғалімнің жазылып қалған сөзі келді. Сонда біз қайда бара жатырмыз?! Неге бізде берілген бұйрықты орындауға қауқар жетпейді?! Сонда біз қандай қоғамды құрып жатырмыз? – деп мәлімдеді министр.
