Орталық коммуникациялар қызметінде өткен брифингте Еңбек және халықты әлеуметтік қорғау вице-министрі Олжас Ордабаев жастарға арналған 2,5 пайыздық микронесие беру бағдарламасы наурыз айында басталатынын айтты.
«Бағдарлама наурыз айында басталады. Қазіргі кезде әкімдіктермен келісімшартқа қол қою процесі жүргізілуде», — деді вице-министр.
Сондай-ақ О.Ордабаевтың айтуынша, микронесиелеу бағдарламасына 29 млрд теңге бөлінген.
«Бұл 5,8 мың адамды қамтуға мүмкіндік береді. Қарыздың ең жоғары сомасы – 5 млн теңге. Несиелеу мерзімі кез келген мақсат үшін 5 жылға дейін болуы мүмкін. Мал шаруашылығы үшін 7 жылға дейін болады», — деп атап өтті ол.
ҚР ЕХӘҚМ Халықты жұмыспен қамту департаменті директорының орынбасары Айжан Жапалбаеваның сөзінше, кепілдікке жылжымайтын мүлік пен арнайы техника қойылады.
Айта кеткен жөн, жыл басында ҚР Еңбек және халықты әлеуметтік қорғау министрлігі жастарға жеңілдетілген микронесие беру қағидасын бекіткен. Аталмыш бағдарлама 2021-2025 жылдарға арналған кәсіпкерлікті дамыту жөніндегі Ұлттық жоба шеңберінде іске асады.
Қағидаларда кәсіпкерлік қызметті бастағысы келетін немесе кәсіпкерлікпен айналысатын 21 жастан 35 жасқа дейінгі жастар үшін конкурстық негізде микронесие беру көзделген. Микронесиелер «Аграрлық несие корпорациясы» АҚ арқылы берілетін болады.
