Бүгін Солтүстік Қазақстан облысының тұрғындарымен кездесу кезінде Энергетика министрі Алмасадам Сәтқалиев жылу электр станциясының тозу деңгейіне қатысты пікір айтты, деп хабарлайды kazbusiness.kz.
«Өңірдегі ең негізгі және өзекті мәселелердің бірі – электр энергетикасы саласы. Солтүстік Қазақстан облысында электр және жылу энергиясын Петропавл жылу электр орталығы өндіріп жатыр. Станцияның электр қуаты 512 МВт, жылу қуаты – 713 Гкал/сағ. Бұл ретте, станциядағы негізгі жабдықтардың тозуы 56,1 пайызға жеткен», – деді А. Сәтқалиев.
Оның айтуынша, 2022 жылы жөндеу жұмыстарына инвестиция аз бөлінуіне байланысты Петропавл жылу электр орталығында технологиялық іркіліс жағдайы бір жарым есеге, ал 2019 жылмен салыстырғанда үш есеге өсуі тіркелді.
«Осыған дейін мұржаның жоғары жағы құлаған болатын. Министрлік техникалық жағдайын бағалау жүргізу үшін Петропавл жылу электр орталығына тәуелсіз сарапшылар комиссиясын жіберді. Оның қорытындысы бойынша Петропавл ЖЭО–2-нің жұмысын қалыпқа келтіру бойынша жол картасы әзірленді. Осы мәселені шешу мақсатында 2022 жылы 6,3 млрд теңге инвестиция бөлінді. Ал биыл 5,6 млрд теңге инвестиция тарту жоспарланып отыр», – деді министр.
Естеріңізге сала кетейік, былтыр 20 наурыз күні Петропавлдағы ЖЭО-да үш түтін мұржасының бірі опырылып құлады.
