Тыйым салынып, сатылымнан алып тастауға ұсыныс түскен электронды темекі өнімдерін Қарасай ауданында шығару қолға алынбақ. Бұл туралы облыс басшысының өңірге жасаған жұмыс сапары барысында белгілі болды, деп жазады kazbusiness.kz тілшісі.
Елтай ауылдық округіне қарасты Көкөзек ауылында салынатын зауыт жоспарын “КТ&G” ЖШС ұсынған. Аталмыш кәсіпорын қарапайым және электронды темекі өнімдерін шығаруды қолға алады. Тіпті облыс әкімі Марат Елеусізұлы жұмыс сапарымен барып, құрылыс жұмыстарымен де танысып қайтқан. Осы ретте “тыйымды” облыс әкімдігі де қолдап отырғаны емес пе?
Облыс әкімінің баспасөз қызметінің хабарлауынша, жоба құны – 200 миллион доллар. Жоба инвестициялық қаржы есебінен іске асады. Өндіріс қуаты – жылына 108 миллион дайын өнім. Одан бөлек жоба барысында 500 жаңа жұмыс орны ашылады деп жоспарланған.
Айта кетейік, Жақында ҚР Парламенті Мәжілісінің кезекті отырысында депутат Нүргүл Тау жастар арасында “вейп” атымен танымал электронды темекілердің жаппай таралуына және қолданылуына тыйым салу мәселесін көтерген еді.
Депутаттық сауалды жолдауға “Respublica” партиясына ата-аналар қауымынан түскен өтініштері себеп болған.
“Денсаулық сақтау саласы сарапшыларының айтуы бойынша электронды темекі құрамында никотин, көмірқышқыл газы, көміртек тотығы, көгеретін қышқыл, аммиак, шайырлы заттар, органикалық қышқылдар сияқты 30-дан астам улы зат бар. Электронды темекі адам өкпесін ірітіп жібереді” – деді депутат.
Оның айтуынша, елімізде электронды темекі бұйымдарын бақылаусыз сатуға байланысты оны қолдану жағдайы жоғары. Ол барлық сауда орындарында, сондай-ақ әлеуметтік желілер арқылы қолжетімді бағада сатылады. Бағасы орташа есеппен 2000 теңгеден аспайды.
Нақты деректерге сүйенсек, дәл осы электронды темекінің кесірінен елімізде жылына 18 000 адам көз жұмады екен. Қазіргі таңда әлемнің 32 елінде сатуға тыйым салған.
Айтпағымыз, депутаттық сауал мемлекет тарапынан қолдау табуы бек мүмкін. Өз кезегінде Қарасай ауданы “тыйымды” елемей, болашаққа жоспар құруы қалай деген сұрақ туындары заңды. Тыйым болмаған күннің өзінде құрамында денсаулыққа зиянды заттар жетіп артылатын темекі өндірісін дамытуға үлес қосқаны ма?..
