Алматы облысында жеке тұлғаға 15 млн теңгеге  сатылып кеткен мектеп мемлекет меншігіне қайтарылды. Бұл туралы Алматы облысының әкімі Марат Сұлтанғазиев айтты, деп хабарлайды kazbusiness.kz тілшісі.

Облыс әкімі білім ордасының 8 маусым күні мемлекет меншігіне қайтарылғанын мәлімдеді. Айтуынша, облыс бойынша мектеп тапшылығы бар. Үш ауысымды мектептер саны да азаймай тұр.

“Бізде үш ауысымды 51 мектеп бар. Нақты осы мектеп (сатылған – авт.) туралы айтсақ, біраз соттастық. 8 маусымда алған адам өз еркімен мектепті үкіметке қайтарып берді”, – деді облыс басшысы ОКҚ-да өткен брифингте.

Еске салсақ, бұған дейін Мәжіліс депутаты Мақсат Толықбай Алматы облысында толық күрделі жөндеуден өткен мектеп ғимараты 15 млн теңгеге сатылып кеткенін айтқан болатын. Депутат білім ордасын екі ай ішінде қайтаруды талап етті.

“Өткен аптада Алматы өңіріне барып келдім. Мектеп туралы айтып жатсыздар. Мен сіздерге бір сұмдықты айтайын. Біз бар мектептің өзін сатып жатырмыз. Мәселен, Алматы облысы Қарасай ауданы Шалқар ауылында Ломоносов атындағы 250 орынға арналған орта мектеп болған. Соңғы жылдары толық күрделі жөндеуден өтіп, жаңадан спорт зал салынып, нысан пайдалануға берілді”, – деді депутат.

Айтуынша, мектепті әкімдік сатқан. Осы туралы білгеннен кейін прокуратураға айтылды. Бұл туралы халық қалаулысы:

“Барлық ауыл баласы қуанып жүргенде, ауыл мектебін жекеге сатып жіберген. Оны әкімдіктен басқа кім сатады? Оны 15 млн теңгеге сатқан. Прокуратураға “Қайда қарап отырсыңдар?” деп айттық. Олар сот шағымын қабылдамайтынын, шамасы жетпейтінін айтып отыр”, – деді депутат Мәжілісте өтіп жатқан Үкімет сағатында.

Одан бөлек Қарасай ауданында мектепті қай әкімнің жеке тұлғаға сатқаны анықталды. Ресми құжаттарға сәйкес, төлемшінің аты-жөні Шерхан Әлібекұлы делінген. Өз кезегінде мемлекеттік нысанды Қарасай тұрғын үй құрылысы деген компания сатып алған. Шерхан Әлібекұлы деген азаматтың ЖСН-ына қарағанда ол 1998 жылы туған азамат.