Бүгін Қаскелең қаласындағы Абылай хан және Байғазиев көшесінің қиылысында орналасқан АХАЖ, сәулет, қала-құрылысы, жер қатынастары бөлімдерінің ғимараттары өртке оранды, деп жазады kazbusiness.kz тілшісі.
Өрт 14:30 шамасында, Абылай хан көшесі бойында орналасқан “Кристал” дәмханасының әжетханасынан бастау алды деген болжам бар. Куәгерлердің айтуынша, өрт сөндірушілер бір сағатқа кешігіп келген. Тіпті кейбір адамдар су да болмады деп айтуда.
Kazbusiness.kz тілшісі оқиғаның мән-жайын анықтау үшін оқиға орнына арнайы барды.
Төтенше жағдай салдарынан аталған әлеуметтік нысандар құжаттары толығымен жойылды.
“Өрт дәмхананың әжетханасынан басталды. Соның артында ЗАГС, жер қатынастарының ғимараты орналасқан. Ғимарат толықтай өрт астында қалды. Өртті байқаған бетте бірден өрт сөндіру қызметіне хабарластық. Алайда олар бір сағат кешігіп келді. Сағат кешкі 17.00 болса да, қызыл жалын әлі толық сөндірілген жоқ”, – дейді куәгерлер.
Тұрғындар өрт сөндіру қызметкерлеріне наразылықтарын білдіруде. Төтенше жағдайлар бөлімінің ғимараты оқиға орынына жақын жерде орналасқан. Айтуларынша, бір сағат жүріп келетіндей жер емес.
“Өрт сөндірушілер кешігіп келмегенде нысан жанындағы тұрғындардың үйлерін сақтап қалуға болатын еді. Алыс емес, таяқ тастам жер ғой”, – деп наразылығын білдірді Айдар есімді куәгер.
Айта кетейік, Абылай хан және Байғазиев көшесі қиылысының бойында әлеуметтік маңызды нысандар орналасқан. Бір-біріне тығыз орналасқан ғимараттардан бөлек, тұрғындардың үйі және тұрғын жайларын да өрт шалды.
Куәгерлердің сөзіне сүйенсек, АХАЖ бөлімінің құжаттарын, архитектура бөлімі қызметкерлері компютерлерін шығарып үлгерген. Десе де, генжоба, ресми құжаттардың көбі күлге айналды.
Еске салсақ, Қарасай ауданында бұған дейін де жер дауы мен заңсыз құрылыс дауы ушығып тұрған еді.
