Binance криптовалюталық биржасы Қазақстандағы өз пайдаланушылар арасында криптовалютаға қатысты сауалнама жүргізді. Оның нәтижесінде сандық ақша туралы бірқатар қызықты деректер анықталды.
Сауалнама мыңнан астам адам (1180) арасында 2022 жылдың қазан, қараша айларында жүргізілген. Сауалға қатысушылардың басым бөлігі ер адамдар – 84,9%, ал әйел адамдардың үлесі – 15,1%. Сондай-ақ, сұраққа жауап берушілердің негізгі бөлігі (25%) өнеркәсіпте жұмыс істейді. Екінші-үшінші орындарды ақпараттық технологиялар саласының қызметкерлері (14,2%) және сауда саласының қызметкерлері 13,1% құрады.
Binance биржасы жүргізген зерттеу нәтижесіне сүйенсек, адамдардың көпшілігі криптовалюта туралы ақпаратты интернеттен (45,4%) және достары не отбасы мүшелерінен (22,9%), сонымен қатар әлеуметтік желілерден (20,2%) алады екен. Дәстүрлі БАҚ көздері арқылы ақпарат алатын адамдардың үлесі небәрі – (3,9%) құрады.
Ал әлеуметтік желілер арасында қазақстандықтар үшін негізгі ақпарат көзі Telegram екені анықталды. Осы желі арқылы отандастарымыздың 48,9% криптовалюта туралы жаңалықтарды біліп отырады. Бұл көрсеткіште екінші орында YouTube – 29,2% және үшінші орында Tik-Tok – 6,3%.
Сонымен қатар, Қазақстандағы Binance сауалнамаға қатысқан пайдаланушылардың криптовалютадағы негізгі активі – Tether (19.3%) болып табылады. Тарихи Bitcoin монетасы екінші орында – 16.2%. Үшінші орында BUSD – 12.8%.
Айта кеткен жөн, ақпан айының басында өткен Digital Almaty форумындағы сессиялардың бірінде криптоиндустрия талқыға түскен. Онда Қазақстандық блокчейн-технологиялар қауымдастығының төрағасы Сапар Ахметов қауіпсіздік мәселелерін ескере отырып, Қазақстанда криптовалюта айналымын енгізу қажет екенін айтқан. Ал Электронды өнеркәсіп және цифрлық активтер индустриясын дамыту департаменті директорының орынбасары Ғизат Байтұрсынов: «көптеген елдерде криптовалюталар төлем құралы ретінде қолданылады. Бізде оған Ұлттық банк әлі дайын емес, дегенмен болашақта жетеміз деп ойлаймын», – деп атап өтті.
