Алматы қаласы прокуратурасы мен Өңірлік кәсіпкерлер палатасының бизнесті қорғау мәселелері жөніндегі жұмыс кездесуінде «Кәсіпкерлердің құқығын қорғау жөніндегі мобильді топ» жобасы таныстырылды.
Жаңа жоба бойынша құқығы бұзылған кәсіпкер арнайы QR-кодты қолдану арқылы Алматы қаласы прокуратурасы кәсіпкерлерінің құқығын қорғау жөніндегі мобильді топқа жүгіне алады.
Қалалық прокуратура кәсіпкерлік субъектілерінің барлық объектіне арнайы QR-код орналастыруды жоспарлап отыр. Олардың қатарында дүкендер, базарлар, дәріханалар, сұлулық салондары, фитнес орталықтары, кеңселер және кәсіпкерлердің кез-келген үй-жайлары болуы мүмкін.
«Жобаның жұмысы келесідей, кәсіпкер кәсіпкерлік қызметке заңсыз араласу туралы сигнал беру үшін QR-кодты сканерлейді, бұдан әрі заңсыз араласу фактілері туралы қысқаша ақпаратты баяндайды. Егер бар болса, фотосуреттер мен видео материалдарды қоса жібереді. Әрі қарай Прокуратура ақпаратты сигнал бойынша 30 минут ішінде бағалайды және қажет болған жағдайда сигнал түскен объектіге барып жедел әрекет етеді», – деді Медеу ауданы прокурорының орынбасары Бауыржан Төлендинов.
Кәсіпкерлерден түскен барлық сигнал қала прокуратурасының дерекқорына түседі және аудандар бойынша топтастырылады. Кейіннен бұл ақпарат прокуратура мен кәсіпкерлер палатасына сигналдарды талдауға және қаланың жүйелік проблемаларының тізілімін қалыптастыруға көмектеседі.
