Қаржы пирамидасын құруға және басқаруға күдік бойынша Sincere System Group (S-Group) компаниясының өкілдеріне қатысты сотқа дейінгі тергеуді Алматы қаласы бойынша АФМ департаменті бастады, деп хабарлайды kazbusiness.kz тілшісі Қаржы мониторингі агенттігінің баспасөз қызметіне сілтеме жасап.
Қызметкерлер қала белсенділерінің қатысуымен компанияның қызметін ерте сатыда тоқтатты, бұл алданған салымшылардың санын азайтуға мүмкіндік берді.
S-Group компаниясының өкілдері салымшыларға айына 6%-дан 8%-ға дейін немесе жылына 70%-дан астам жоғары кірісті уәде етті. Салымның ең төменгі сомасы – 100 АҚШ доллары. Сондай-ақ, салымшыларды өзіне тартқан жағдайда соманың 5% мөлшерінде кепілдендірілген табыс алу көзделген.
Бұл ретте клиенттерге ақшаны қабылдау фактісін растайтын қандай да бір құжаттар мен шарттар ұсынылмады, салым сомасы жеке кабинетте цифрлық түрде көрсетілді, салынған қаражатты алу мүмкіндігі болмады.
Сотқа дейінгі тергеу жүргізілуде. Күдіктіге қатысты қамауда ұстау түріндегі бұлтартпау шарасы санкцияланды.
“Егер сіз және сіздің жақындарыңыз S-Group компаниясының қызметімен бетпе-бет келсе, Алматы қаласы бойынша Экономикалық тергеу департаментіне немесе АФМ call-орталығына хабарласуыңызды сұраймыз”,-деп толықтырды АФМ баспасөз қызметі.
ҚР Конституциясының 77-бабы 3-тармағының 1-тармақшасына және ҚР Қылмыстық іс жүргізу кодексінің 19-бабы 1-бөлігіне сәйкес адам қылмыстық құқық бұзушылық жасаудағы кінәсі заңды күшіне енген сот үкімімен белгіленгенге дейін кінәсіз деп есептеледі.
