Қаржылық кеңестерімен халық арасында танымал блогер Дәулет Төлеутайұлы (@dauletten) Алматыдағы студенттермен кездесу кезінде бизнесті қалай нөлден бастауға болатынын айтты.
«Бизнес деген сіздің сүйіспеншілігіңізден басталуы керек. Мен инстаграмда тікелей эфирде «пирожки сатып та миллионер болуға болады» деп айтам ғой. Бір күні Нұргүл деген оқырманым маған «пирожки сатып 3 айда миллион таптым» деп хат жазып тұр. Мен қалай пирожки саттыңыз десем, пандемия кезінде үйден пісіріп, соны Астана дүкендеріне таратқан екен. Кешке ақшасын алып кетеді. Басында жаяу жүрген, сосын велосипед алған. Жаяу жүріп 12 дүкенге барса, велосипедке мініп 20-30 дүкен аралаған. Сонда айтқым келетіні – өзінің сүйіспеншілігі ғой. Әр нәрсе өзіңнің махаббатыңмен болуы керек. Жаныңды беріп істемесең, жұмыс өнбейді», – деді ол.
Сондай-ақ, өз сөзінде Дәулет бизнесті нөлден бастауға болады дейтін адамдарға келіспейтінін айтты.
«Сосын бизнесті нөлден бастауға болады дегенге онша келіспеймін. Адамда жоқ дегенде 40-50 мың теңге болуы керек шығар. Тренингтерге барсаң, бизнес нөлден бастауды үйретеміз дейді. Қазір дәретханаға барсаң да 100 тг төлейсің ғой. Сондықтан бизнес нөлден басталмайды, бәрібір капитал болуы қажет», – деп түсіндірді блогер.
Ол сонымен қатар, өз оқырмандарының біріне бизнес ашуға қалай көмектескені туралы да баяндап берді.
«Пандемия кезінде Гүлзат есімді қызылордалық оқырманыма көмек ретінде 50 мың теңге аударып жібергенмін. Ол сосын «50 мыңға азық-түлік алайын ба, әлде бірнәрсе бастайын ба» деп ойланыпты. Сөйтіп ақыры осы ақша морс кәсібін бастап кеткен ғой. Ал қазір күніне 40 мың теңге тауып отырмын дейді. Оған қоса, кәсіпкерлерге берілетін қайтымсыз гранттан 500 мың алған, енді 5 миллионның грантына тапсырып жатыр. Мен үнемі осы кісіні кейс ретінде айтамын», – деді Д.Төлеутайұлы.
