Еліміздегі көптеген клуб, бар және мейрамханалар қонақтарынан алдын ала белгілі бір ақша төлеуді талап етеді және депозит төленген жағдайда ғана оларды қабылдауға дайын. Мейрамхана қонағы депозит мөлшеріне тең немесе одан қымбаттырақ сомаға тапсырыс бере алады. Дегенмен, тапсырыс құны алдын ала төленген ақшадан төмен болса, төленген қаражат қайтарылмайды. ҚР Тұтынушылардың құқықтарын қорғау комитетінің мамандары айтуынша, мұндай талаптар Қазақстан заңына қайшы келеді.
Депозиттік төлем әдісі заңсыз – “Тұтынушылардың құқықтарын қорғау туралы” ҚР Заңының 28-бабына сәйкес сатушы мекеменің жұмыс режимін ескере отырып, тұтынушыға қолайлы уақытта тұтынушыға тиісті сапалы тауарды еркін таңдауды қамтамасыз етуге міндетті. Тұтынушыны тауарды қажетсіз мөлшерде және (немесе) ассортиментте сатып алуға мәжбүрлеуге тыйым салынады.
Егер келуші депозит төлеуден бас тартқандықтан, мекеме әкімшілігі оған қызмет көрсетпесе, бұл да заңсыз іс-әрекет болып саналады.
“ҚР Азаматтық кодексінің 387-бабында сатушы мен сатып алушы шартты жария жасайтыны, сатушы өз кезегінде оған жүгінгендердің барлығына қатысты қызметтерді жүзеге асыруға міндетті екендігі айтылған. Яғни, сатушы тауарды әрбір сатып алушыға сатуға міндетті, мекеме әкімшілігі әрбір келушіге қызмет көрсетуге міндетті”, – деп хабарлады ТҚҚ комитеті.
