Оралда кәсіпкерді пышақтап өлтірді деген күдікке ілінген 31 жастағы Руслан Қожантаев пен 21 жастағы Тұрлан Амангелді ұсталды. Аса ауыр қылмыс жасаған күдіктілердің қалай ұсталғаны туралы Батыс Қазақстан облыстық полиция департаменті бастығының бірінші орынбасары Жанболат Жаншин айтты.
Жанболат Жаншиннің айтуынша, полицейлер қылмыс жасалған жерге жақын бау-бақшалар мен саяжайларды тексерген. Осылайша тәртіп сақшылары күдіктілер сол жерде жасырынғанын анықтады.
“Қылмыс жасалған жердегі барлық бейнебақылау камерасын қарап шықтық. Соның арқасында қылмыскерлердің қай жаққа кеткенін білдік. Бүгін сағат 10:30-дың шамасында Орал қаласының “Көктем” саяжайында екі күдікті құрықталып, полиция департаментіне жеткізілді. Олар полицейлерді көргенде қашты, бірақ қарсылық көрсеткен жоқ. Тергеу Қылмыстық кодекстің 99-бабы, 2-бөлігі бойынша жүргізіліп жатыр. Онда 20 жылдан бастап өмір бойына бас бостандығынан айыруға дейінгі жаза қарастырылған”, – деді Жаншин арнайы ұйымдастырылған брифингте.
Тергеу шараларын ішкі істер министрінің өзі жеке бақылауына алды. Полиция департаменті күдіктілердің марқұм кәсіпкердің қол астында жұмыс істегенін, я істемегенін растамады.
“Ондай ақпарат жоқ. Тергеу кезінде бәрін анықтап, сіздерге хабарлаймыз”, – деп атап өтті Жаншин.
Сондай-ақ, бір қылмыскердің деструктивті ағымға қатысы бар-жоғы да тексеріліп жатыр. Себебі ол қылмыс жасағаннан кейін полицияның көзіне түспеу үшін сақалын қысқартып тастаған.
