Алматы облысының Қарасай ауданында бұрынғы «Каменский» асыл тұқымды шаруашылығының жерлері төңірегіндегі дау әлі басылмай тұр. Бұл мәселеде халық екіге бөлінген және әр топ өзінің құқығы тапталып жатқанын айтады, деп хабарлайды kazbusiness.kz.
Бүгінгі Жаңатұрмыс ауылында кеңес дәуірінде құрылған «Каменский» асыл тұқымды шаруашылығы өзге кәсіпорындар секілді еліміз тәуелсіздік алғаннан кейін иесіз қалған. Уақыт өте азаматтар біраз жылдар қараусыз жатқан шаруашылықтың жер учаскелерін Қарасай ауданының әкімшілігінен заңды түрде сатып алады. Алайда жер иелері ақша жұмсап алған учаскелерге енді үй салмақ болғанында, алдарынан бұл жерге өз құқықтарын талап еткен бір топ адам пайда болған. Екінші топ өздерін «Каменский» шаруашылығының бұрынғы жұмысшылары ретінде таныстырып, «пайщик» ретінде жерлерді бөліп беруді әкімдіктен талап етеді. Екі арада дау туып, адамдар әкімшілік алдын шағым-өтініштермен толтырған және бұл жерлер арестке алынған.
Бір қызығы «бұрынғы шаруашылық қызметкерлері» жұмыс өтілін растайтын ешқандай құжат не дәлел көрсете алмай отыр. Ал «Naqty» газетінің хабарлауынша, бұл алаяқтықтың кезекті механизмі болуы мүмкін. Басылым жер мәселесіндегі алаяқтық келесі сатылармен жүзеге асырылатынын көрсетеді:
- Бастамашыл топ құрылып, өздерін «пайщик» ретінде таныстырады;
- Сот алдын шағым-өтініштермен толтырады;
- Бұқаралық ақпарат құралдарында және әлеуметтік желілерде шу шығарып, конституциялық және өзге де құқықтарының бұзылғаны туралы мәлімдейді;
- Осы уақытта топ басшысының айтуымен өздеріне тиесілі емес жерлерді заңсыз иемденіп алады;
Басылым мұндай механизм бұрын да қолданылғанын айтады. 2017 жылы дәл осындай жолмен жер талап еткен бір топ адам сотталған. Істі болғандардың бірі 5 жылға сотталып, 60 млн теңге көлемінде өтемақы төлеуге міндеттелсе, екіншісі 2 жыл шартты түрде сотталған және 10 сағат түзеу жұмыстар мен 3 млн теңге өтемақы төлеуге міндеттелген. Ал бұл оқиғадан 2 жыл бұрын Мадина Дадаева есімді әйел дәл осындай құйтырқы әрекетке барған.
Басылым осы жолы «бұрынғы жұмысшылар» тобын Лязат Жапашева басқаратынын және оның үстінен «Алаяқтық» бабы бойынша қылмыстық іс тергеп жатқанын хабарлайды.
Дегенмен бастамашыл топ өкілдері 18 мамыр күні баспасөз-конференциясын ұйымдастырып, Л.Жапашеваны босатуды талап етті.
«Бүгінде бұрынғы жұмысшылардың біразы қайтыс болды. Бірақ олардың артында 20 жыл өз жерлерін күткен балалары бар. Лязат мұрағаттан көптеген құжаттарды жинаған болатын. Бірақ Қарасай ауданындағы мұрағат қандай да бір себептермен өртеніп кетті және көптеген «пайщиктердің» бүгінде құжаттар жоқ. Біз одан (Л.Жапашева) ешқашан бас тартпаймыз», – деп мәлімдеді Жапашева жақтастары orda.kz-ке берген жауабында.
Айта кеткен жөн, бұл мәселе бойынша жерді заңды жолмен сатып алған азаматтар да бірнеше рет жиналып, әкімдік өкілдерімен кездескен. Kazbusiness.kz бұл жиындардың барысынан да бірнеше рет хабар таратты (материалдармен толығырақ танысу үшін https://www.youtube.com/watch?v=-JAunQN_-8c , https://www.instagram.com/tv/CraOEsYg5nY/?igshid=NjZiM2M3MzIxNA%3D%3D).
Жер иелері жиналыста екінші топтың «самозахват» жасап, дау тудырған жерлерге үй сала бастағанын мәлімдеген.
«Олар қазір салып алған үйінен шықпайды. Киіз үй тігіп, алабайын есік алдына қойып қойған. Ата-ана кіргізіп, от жағып қойған», – дейді азамат. Жиын қатысушыларының тағы бірі осы даудың кесірінен жалдамалы пәтерде жүргенін айтады.
«Мен қазір отбасыммен бірге жалдамалы пәтерде тұрамын. Осы учаскені сатып алып, алдымен уақытша тұрғылықты жер, содан кейін үй салғым келді. Барлық құжаттар менің қолымда. Мен адал адаммын, бірақ неге менің құқығымды ешкім қорғамайды?», – дейді ол.
Әкімшілік өкілдері жер иелеріне заңсыз құрылыс салынып, оның заңсыздығы дәлелденген жағдайда, үйлердің бұзылатынын мәлімдеді.
Kazbusiness.kz бұл мәселені ары қарай да назарда ұстайды.
