Қағаз бетіне түрлі киімнің эскизін салып өскен бұрымдының негізгі мамандығы – дизайнер. Колледжді аяқтағаннан кейін киім мен ұлттық бұйымдарды тігумен айналысқан. Сауда-саттық пен ауылшаруашылығы саласында да бағын сынап көрген. Соңғы жылдары үйден заттар тігімен айналысқан. Ісмер ару 2022 жылдың наурыз айында Алматы облысының әйелдер кәсіпкерлерін дамыту орталығына жүгініп, онда бизнесті ілгерілетуге жөнінде көмек пен кеңес алды. Енді Өңірлік іскер әйелдер кеңесімен серіктестікте кәсіпкер төрт елдімекенде тігін цехтарын ашуға ниетті.
«Әйелдер кәсіпкерлігін дамыту орталығы мен Алматы облысы іскер әйелдер кеңесінің, сондай-ақ әкімдіктердің қолдауымен жақын арада Текелі қаласында, Қапал, Жансүгіров және Балпық би ауылдарында тігін цехтары іске қосылады. Қазір ұйымдастыру мәселелерін аяқтаудамыз. Әйелдерді жұмыспен қамтып, істеріне қолғабыс ету үшін, цехтар шалғай елді мекендерде ашылатын болады», – деп атап өтті Қымбат Қасейін.
Осылайша, аталмыш цех желілері еліміздің жеңіл өнеркәсібінің дамуына өзіндік үлесін қосады.
«Отандық киім мен аяқ киімге, ұлттық киімдер мен тоқыма бұйымдарына сұраныс жоғары. Бірақ бүгінде қазақстандықтар Қырғызстаннан тоқыма бұйымдарын сатып алуға мәжбүр. Сондықтан біздің жобамыз Бішкектің өнімдеріне балама болады. Әзірге Алматы облысында, кейін болашақта басқа облыстар мен жақын шетелдерге өнімдерімізді шығарамыз», – деді кәсіпкер ханым.
Төрт өңірде тігін цехтарын ашу 95 жұмыс орнын құруға мүмкіндік береді. Сондай-ақ, Әйелдер кәсіпкерлігін дамыту орталығы арқылы тігін ісіне оқыту және білікті кадрлар даярлау жоспарлануда.
Естеріңізге сала кетейік, өткен жылдың қараша айынан бастап ҚР барлық өңірлерінде Ұлттық экономика министрлігі, ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия және «Атамекен» ҰКП әріптестігі аясында «Ынтымақтастық Қоры» аясында әйелдер кәсіпкерлігін дамыту орталықтары ашыла бастады. Бастаманы Азия Даму Банкі және Қазақстандағы БҰҰ Даму Бағдарламасы қаржыландырады және оны «Атамекен» ҚР ҰКП жүзеге асырады. Орталықтардың қызметі «Атамекен» іскер әйелдер кеңесінің (2015 жылдан бастап жұмыс істеп келеді) қағидаттарына, олардың ең бастысы – бизнесті жүргізу мен дамытуда әйелдерді өзара қолдауға негізделеді.
