Тарихқа үңілсек, 1981 жылы бұл жерде «Рахат» шипажайы жұмыс істеген. Уақыт өте келе, 2006 жылы оның базасында мұнайшылардың балаларына арналған лагерь пайда болды. Кейінірек нысан атауы «Сары-Арқа» деп өзгертілді.
2010 жылы белгісіз себептермен демалыс орнының жұмысы тоқтап, ғимарат тіптен қаңырап, бос қалды. Көп ұзамай-ақ, ол толығымен талан-таражға түсіп, қирай бастаған.
Өткен жылы Қарасай ауданының туризмін дамытуды мақсат еткен кәсіпкер Серік Сақабаев осы нысанды жаңғыртуды қолға алды. Сөйтіп, 2022 жылдың мамыр айында санаторийді қалпына келтіру жұмыстары басталып кетті.
Қазіргі таңда шипажай аумағындағы сегіз ғимараттың төртеуі күрделі жөндеуден өткен. Жөнделіп қана қоймай, толықтай жасақталып, таяуда ғана Rahat Resort атауымен оңалту-сауықтыру кешені келушілерге өз есігін айқара ашты.
Кәсіпкердің сөзіне сүйенсек, аталған іске 500 миллион теңгеге жуық инвестиция құйылған. Олардың біразын «Даму» қорының қолдауымен «ForteBank» АҚ қаржыландырған.
Емдеу ғимаратының меңгерушісі Айжан Бекованың айтуынша, кешенінің негізгі қызметі – инфаркт, инсульт, түрлі жарақаттар мен оталарға ұшыраған науқастарды оңалту болып табылады. Ол үшін Ресейде, Германияда, Швейцарияда жасалған заманауи құрал-жабдықтар, соның ішінде нейро-және травматологиялық реабилитацияға қажетті роботтық жабдықтар жеткізілген.
Бұдан бөлек, шипажайдың есігі арнайы келіп курорттық ем алам деушілер үшін де айқара ашық. Ол үшін физио, парафинді және балшықпен емдеу процедуралары, оттегімен емдеу, ингаляция жүргізіледі, әмбебап жаттығу залы және тұз шахтасы, сауна, бассейн және фито-бардан тұратын SPA орталығы жұмыс істеп тұр.
Бұл емдеу-сауықтыру мекемесінің жалпы аумағы екі гектардан асады. Айналасы түгелдей қылқан жапырақты, жапырақты және жеміс ағаштарымен абаттандырылған.
Бүгінгі таңда Rahat Resort кешенінде барлығы 80 төсекке есептелген бір, екі орынды және люкс бөлмелері бар. Кешен ашылғалы жергілікті 30 тұрғын жұмыспен қамтылған.
